青心直說：荷李活有間大賭場

正所謂「生意淡薄，不如賭博」，美國電影業受經濟不景打擊，有人竟然想出搞電影期貨，預測電影票房表現，美其名為電影業界對冲風險，實情又係搵個投機炒作題材。美國電影協會、全美戲院公會及導演公會等都反對有關建議，不過美國商品期貨交易委員會最終都批准，成立特別交易所畀業界同機構參與，並打算成立門檻較低嘅第二市場，畀散戶玩。其實若果電影都可以做期貨，基本上無厘頭乜都可以。足球、 NBA、奧運、出生死亡離婚率，總之有人想賭就可以開枱。江山易改、賭性難移，荷李活將來不但是夢工場，更是大賭場。美國在另類期貨一向走在最前線， 96年已開始喺場外（ OTC）引入天氣期貨，成功吸引保險公司及基金參與。只係單單幾年時間，天氣期貨就成功進入芝加哥交易所（ CME）攞正牌交易。目前，投資者可打賭全球 42個城市溫度指數。
內地期市發展空間大

內地推出股指期貨僅僅幾日，成交額已超前滬深兩地股市，成交張數較香港更活躍，更多咗聲音話要加快發展中國期貨交易市場。去年內地期貨交易總額為 19.1萬億美元，只佔全球超過 600萬億美元交易額的一個極小比例，理論上發展空間不小。股指期貨開通後，市場深度及波幅似已加大，單邊挾升難度大咗。港股近日炒法亦較有中資特色，資金往往無厘頭流入一至兩個板塊，喪炒一通快閃，有點像玩「秒殺」促銷。內地資金繼而炒起埋 A股 ETF，成交急增，輪場亦大收旺場。投資者想吼實內地股指期貨來炒，大部份仍會買安碩 A50中國基金（ 2823），不過佢本身係跟新華富時 A50指數，而唔係追蹤滬深 300指數，兩者走勢難免會有偏差。真正跟實滬深 300指數走嘅有標智滬深 300（ 2827）、安碩滬深 300（ 2846）及 DBX滬深 300（ 3049），其中 DBX近日最旺場，可能與價碼細、入場費最低有關。胡孟青