陸羽仁 - 中年儲夠千萬冇難度

有清楚理財目標去營運人生，要在退休之時達到財務自由，要為自己定下目標金額，然後定出計畫，為達成計畫而增加收入，合理支出。

運用儲錢投資基本法，頭10年每月平均儲5000元，之後的年份每月平均儲1萬元，儲21年就有500萬，儲28年就有1000萬元。可能有人覺得這個數字儲得太多，有人認為儲得太少，其實唔緊要，多少各人自己決定，我只係計一條數，話畀大家聽，要到中年有1000萬，唔係咁遙不可及，起碼我講的儲蓄目標，都唔係咁離譜，好多人都可以做得到，可以畀大家一個目標去努力。

但呢條漸進增長的數字成程式，一啲都唔快，保證唔可以一朝發達，但亦不會永遠到不了站，當中的關鍵是每年10%回報的複式增長，過程中唔可以點輸錢，一輸得多，就會大大拖後目標實現的日子。

要知風險一年求10%回報

網友花大柑有一個留言值得注意，佢話：「陸Sir：多謝你的營運人生系列，真的，對我這些30出頭，曾經係股市贏過大錢，之後輸凸的人來說，是一個好大好大的警惕。輸的不但是金錢，而且更輸掉了黃金的十年。一切都還原基本，短短的幾年就好似發場夢(發達夢)，現在該是夢醒的時候！」

花大柑的經驗，相信也是不少爛炒網友的經驗，遠的不說，以07年為例，只要夠膽去買，真係盲俠都可以贏大錢，但殺紅了眼，又有多人能保持清醒，在適當時候離場呢？10萬炒到變20萬，20萬變40萬，40萬變80萬，80萬變160萬……贏錢的快感可以留住所有人，感覺距離千萬富翁只是幾個月之遙，確實無乜邊個走得到，最後就一網打盡。好似花大柑咁講，最後還原基本，咁就唔見咗10年的儲蓄，等於浪費咗10年。

所以呢個積蓄加投資的計畫，投資的部分，要比較保守，要知道回報和風險成正比例，無乜可以在短期內倍升的投資，唔係存在相當的風險，所以呢個計畫只容許「投資的我」參加，唔啱「投機的我」玩，「投機的我」會認為，我炒隻股仔，咁啱係大升股，真係會成倍成倍咁上，你要求一年回報10%的回報，有乜味道呀，咁買法點會發達架？的確，這種方法不可以一朝發達，但亦唔會一鋪輸清，低回報，低風險是也。

做好研究回報多好多

我唔反對人投機，但認為要量力而為，一般人搵錢能力唔太高，唔係有太多條件輸錢，因為輸咗大錢好耐都搵唔番，所以唔好瞓身做「投機的我」，撥一部分錢，畀「投機的我」，細細注玩吓算啦。我會咁同「投機的我」講，既然你咁醒，買親啲嘢都成倍咁升，咁我都唔使畀太多本金你，反正你炒幾炒都可以搵到番嚟。「投機的我」係唔係咁叻，試吓就知。

我建議呢個「投資的我」，既然目標係賺10%一年，低買高賣，升到10%可以離場，博佢升到咁上下會回吐，回番咁上下又可以再買過，博佢走多一轉，一年搵到 20%都講唔定，有好的年頭，就可以補吓無咁好的年頭，因為一定有個別年份賺唔夠10%回報，但有好年頭拉上補下，最後都有10%的年均回報，不要睇少呢 10%，股神巴菲特都唔係賺多好多咋。唔怕行得慢，只要能到站。

我覺得只要你做得10年、8年「投資的我」，對股份好有研究時，回報絕對可以多過10%好多，但這是練好武功的後話。

簡介

財經專欄名家陸羽仁，貴為企業CEO，周一至五在《頭條日報》開筆談股論市，深受讀者歡迎，更在頭條網開BLOG，分享投資心得，累積點擊率已突破六千九百萬人次。