青心直說：黃金周打老虎攻略

今個周末節目多，除咗世博開幕，亦係五一黃金周開始，資金已喺零售股身上順勢連環炒作，由時裝炒到化妝品，再落去超市百貨，惟獨家電、汽車股反其道而行，繼續捱沽，資金明顯循估值換馬，物極必反之過也。同黃金周息息相關嘅，仲有濠賭板塊，繼早前大行連環出報告唱好後，幾隻賭業股於高位整固之際，似有無形之手密密施展吸星大法。五一黃金周由以往 7日縮減至 3日，以為長線團少咗會影響旅遊收入，時間證明賭場始終具吸引力，只要簽證寬鬆，任何日子都可以係假期，人流繼續旺盛。幾隻賭業股業績好壞參半，綜合近期大行報告，多數睇好市佔率最高、達 29.4%嘅澳博控股（ 880），對第二大佔 23%嘅金沙中國（ 1928）睇法就有啲分歧。根據澳門博彩監察協調局公佈，當地首季博彩總收入 409.5億澳門元，按年增長 57.4%，當中貴賓廳百家樂枱（亦即內地客最愛嘅賭枱）佔總收入七成。
澳博可睇高一線

澳博同金沙生意定位大不同，澳博去年營業額 341億元，貴賓廳佔總收入 59%；市佔率最高嘅一般賭枱，則佔 38%。相反，以家庭客及會展為目標嘅金沙，去年 VIP收入持平只有 12.7億元（佔整體 25%）。呢種現象正好解釋點解金沙嘅賭場旺丁唔旺財，去年第 4季 EBITDA低過預期只有 2.51億美元，更要為應收賬作 20%撥備。無論盈利能力同增長空間，都證明猛虎不及地頭蟲，最賺錢嘅始終要有高消費客優勢，澳博應可睇高一線。不過金沙都有一樣長處，就係角子老虎機，去年澳門整體老虎機收入超過 65億元， 33%送咗入金沙虎口，平均每次可賺（ Win per average slot）逾 1600元，遠勝同業，澳博則唔夠 700元。下次過大海打老虎（機），你知道邊度「鬆手」啲啦。胡孟青