陸羽仁 - 一字記之曰炒

美國聯儲局宣佈維持利率不變，沖淡了投資者對歐洲債務危機進一步惡化嘅憂慮，美股昨日小幅反彈。港股昨日係期指結算日，恒指跟隨美股小幅高開後，在 21000點附近爭持。內地A股午後跳水，上證綜指下滑1.1%，由升轉跌，拖累恆指下挫近190點，收市仍跌170點，收報20778點。現貨月期指以 20889點結算，5月期指則大低水279點，大市成交與上日相約，成633億元。

港股近期可謂腹背受敵，既受內地政府緊縮樓市政策制約，又要面對歐豬五國的危機，短期都冇乜利好因素。中環茶友話，恒指已經自4月12日開始形成小型下降通道，由近期高位22388點，跌到昨日收市位，已跌了 1610點，雖然跌得唔少，但可能仲要深啲，由於係陰陰跌，唔係跌得好急，反而唔似已經跌到支持位。在1月那一轉回吐得好深，由差唔多的高位跌咗3248 點，回到19423點先至停，呢次即使唔使回咁深，亦怕佢即使有反彈，都要再試吓20000點大關。

電訊股要回頭

昨日拖累大市向下嘅主要元兇係電訊行業，主要因為聯通(762)的季度業績唔靚仔，佢公佈首季業績，錄得純利11.3億元人民幣，按年跌68%，每股盈利 4.8分。

未計利息稅務和折舊收入(EBITDA)為150億元，比上年同期下降7.5%。營業額增加6.6%至404億元。

聯通生意做多咗6.8%，但純利下跌，主要受網絡規模擴大和3G業務運營初期影響，折舊及攤銷、財務費用、銷售費用和網絡、營運成本增長較快，共產生成本費 389億元，比上年同期增長17%。換言之，在3G業務投資期，都好難期望佢好好賺，估計此情況未來仍會持續一段時間。聯通業績唔靚，股價跌3.2%；拖累其餘的中資電訊及設備股全線向下，設備股更係跌市重災區，中國無線(2369)更重創9%。

早排電訊和設備股炒三網合一概念，聯通等大網絡商唔係炒得咁甘，高低位都係升咗一成左右，但係啲中型股都炒得幾癲吓，例如晨訊(2000)就由2月時1.1元左近，炒到今個星期二近2.5元，兩月升咗1倍有多，所以昨日借個勢就回，昨日單日都跌咗8.3%，都跌得幾慘烈吓，買入炒作真係要定止蝕位至好。

影子股好易插

中環茶友話，好多時跟風買股，一字記之曰炒，升到咁上下即使唔食胡，一回頭都要閃，好似炒新股的影子股亦係咁。昨日上啲新股對辦喎，新股昂納(877)及思嘉集團(1863)表現理想，昂納收3.99元，比招股價高38%，思嘉亦升12%。

招緊股的歐舒丹(973)及朗生醫藥(503)，朗生孖展勁啲，但影子股已開始回，武夷藥業(1889)急跌9%，中國製藥(1093)跌7%、聯邦制藥(3933)跌5%，顯示炒影子股者未等好消息全面兌現，未等隻朗生截晒飛，就偷步沽貨，好似隻武夷藥業，早上還在近高位1.15元，但收市已跌番落1.03元，如果即市睇住佢，高位回5%就應該止賺離場啦，唔好等新股上市，唔好以為可以食到盡，炒影子股，來去快到無影呀。