青心直說：小零件締造大生意

今個禮拜五第 11屆北京國際車展開鑼，近年內地車展已成為車市風向重要指標，即將展出嘅 990輛車中， 89輛屬全球首發。根據汽車工業協會統計，內地首季度汽車銷售 461萬輛，增長 72%，業界預期今年整體銷量將增長 23%，有信心未來 5年會以平均 15至 20%增速向前。中國去年躍升為全球最大汽車消費國，總共消化咗 1364萬部車，足足係 01年嘅 5.7倍。喺政策補貼支持下，轎車銷售增長 56%至 1170萬輛。但銷量高唔代表賺得多，作為代工，銷量點好都唔夠自主研發嘅毛利高。汽車工業發達，上游零部件業務保持強勁增長。根據 AlixPartners資料，內地零部件行業去年收入 1.14萬億元人民幣，整體毛利率近 10%，遠高於日本及美國，係全球最賺錢。
汽車零件毛利高吼敏實

講起汽車零件，首選當然係基金愛股濰柴動力（ 2338），即將於下周一公佈嘅業績肯定見得人，預計淨利潤有望倍增。短炒濰柴價碼大，難度高，昨日反而有部份資金轉投做門框同沙板等配件嘅敏實集團（ 425）。呢間台資背景零件製造商，喺公佈去年純利增長 47%後，順手以先舊後新配股集資 11.9億元擴產能，配股價 12.25元，之前股價已由 2月初 10蚊樓下，炒到上 13蚊樓上，派完成績表同配股後財散人安樂，證明早前炒上絕對唔係無端端，前日仲插穿埋 11蚊。公司全年賺 6.21億元人民幣，毛利增至 38.1%，市場佔有率超過兩成。現金充裕卻大額配股集資，主席秦榮華喺 08年股價一路跌時，由 5蚊樓上增持到兩個幾，家股價升咗幾個開。呢次配售 9700萬股，持股攤薄至 40.85%，咁啱上次 07年配股，個價又係咁上下 12.50元，之後熊市就來臨，對時機掌握同經營業務同樣一流。希望呢位台灣 50大首富呢次配股，唔似得上次咁具指標性，否則……胡孟青