陸羽仁 - 避重就輕玩尋寶

有消息指美國證監會內部對是否起訴高盛出現分歧，刺激高盛及金融股反彈，美股小幅高收。呢啲路邊社消息可以搞番定個市，好明顯係個市根本唔想跌住，所以就搵個藉口事後解釋啫，陸羽仁都話，港股俾雙鬼拍門，但講殺傷力，始終係內地大力打壓樓市得人驚啲，好彩係內地A股連日下挫後，開始有承接，恒指也反彈上20天移動平均線，收報21623點，升218點。大市交投溫和，成交627億元。

市場昨日嘅焦點之一係民行(1988)，民行出售所持有的4.6%海通證券股權，賺咗超過49億元，令2009年淨利潤121億元，增長53%。末期股息5分兼10送2紅股。

民行去年底資本充足率提升至10.83%。副行長趙品璋表示，該行可能會考慮發行債券，進一步增強資本基礎，但排除了短期內在股票市場集資的可能性。民行去年的利潤大部份來自賣嘢，唔係核心業務，大行對民行評級普遍都係一般，瑞信、摩根大通及高盛都維持「中性」評級。

中外夾擊難當無事

指數昨日反彈，究竟係咪可以當無事發生呢？照計高盛單嘢開得一間，可能會有第二間被人調查，雖然大家都估最後唔會搞出大單嘢，但短期陸續都會有負面消息，令到市場氣氛好難牛氣沖天。至於內地樓市，估計亦會殺氣沖天。

中環茶友話，去年下半年起，內地樓市一片火熱，去到年初甚至出現搶購潮，樓盤不斷加價，仍然無阻買家入市意欲，內房股不但公佈○九年度業績好靚仔，預計今年上半年條數都應該不俗，但係內房股股價就好似拉牛上樹，點都升唔到上去，同樓市和預期業績背馳，呢個現象好顯然係大戶覺得個市實在過熱，中央遲早大力干預，故此提早出貨，現在睇番，醒目資金拋售，令到內房股比內地樓市提早咗見頂。

若然股市係比樓市走得快，現在樓市開始下跌，內房股股價應該部份反映咗不利因素，關鍵係究竟反映晒未？茶友估計，內房股再次先於樓市見底機會好大，從現在內地樓市開始下跌，距離不計價拋售仲有一段距離，內房股就算見咗底，短期應該好難大升，為安全計，仲係唔需要咁急去撈底。至於成個市受到內外交煎，就算市底唔係好壞，但亦不宜高追。

慳水慳力炒醫藥股

經過急跌後，昨日的反彈市投資氣氛仲係好審慎，資金唔敢落注炒大路股，寧願買同資產市場好似樓市同股市關係較疏的股份，好似中環茶友曾經提過的藥業股。昨日二十隻主板升幅最多的股份中，有7隻係藥業概念，另外仲有好多創業板的藥業股，都創出新高。龍頭國藥(1099)升2%、聯邦制藥(3933)升8%創新高；維奧醫藥(1164)仲誇張，公佈去年盈利倒退 13.23%，但股價急升29%創新高；其他積華生物(2327)升13%、武夷藥業(1889)升12%，資金避重就輕玩尋寶遊戲，但遲來者風險就開始高嘞。

茶友話，內地大力整頓樓市，但不代表想冷卻經濟，「管理層」重手打壓樓市，一來係內房商太過唔識做，阿爺呢邊叫大家唔好炒，嗰邊內房商就推高地王價格，跟住又搞到臨場加價賣樓，如果阿爺唔出手，除咗好無面之外，萬一搞到資產泡沫吹得太大，就可能令經濟硬着陸，故此必要出手打壓，一手唔得就再打，打到得為止；另一方面，其他同資產泡沫無關的產業，則仍然受到中央支持，此所以資金轉去炒唔犯本的醫藥股，又或者係電訊類股份。