陸羽仁 - 重磅股變大嚿石

美股喺就業數據公佈及長假前牛皮靠穩。內地A股偏軟。中資金融股繼續強勢，但頂唔住本地地產股及滙控(005)同中移動(941)等重磅股的跌勢，港股結束連續三日的升市，恒指收21239點，倒跌135點，大市交投漸見活躍，成交增加至671億元。

首季指數負進帳

今年第一季，恒指回落逾600點，主要係重磅股牛皮偏軟，好似滙控及中移動等，另外中港地產股同內銀股受政府關注樓價急升影響，無力再進。本來，今個業績期好多人對大笨象寄望甚殷，點知揭盅業績缺乏驚喜。這幾隻股份好多都係重磅股，拖住指數好似孭住嚿大石咁，就算美股撩到逼近萬一點，但港股全季計都錄得負進帳。

重磅股變成大嚿石，中環茶友留意到，投資者想賺錢就要炒股不炒市，首季有表現板塊，好多都係內地新興產業，同埋出口類股份。內地新興產業股份主要係炒內需概念，重點包括有零售、藥業及新能源。

今年內地兩會好似無重點推動經濟政策出台，但其實好多措施已在進行中，大部份係針對振興農村經濟同改善農民生活，好以家電下鄉，成為拉動家電股的巨大動力，但這類股份不屬於重磅股，所以升勢就無係指數反映出來。

另外，好似藥業股亦受內地醫療改革影響。內地管理層要改善農村醫療服務水平，一方面要拉低藥價；一方面會把醫療服務推到農村，兩個因素一加一減，對藥業股綜合影響係利多於弊，令到藥業股紛紛起飛。不過，藥業股質素好參差，真係要花啲心機先揀到好嘢，而經過一輪尋寶遊戲後，藥業股如果有番咁上下增長前景，市盈率同市帳率普遍都已經唔平。

展望第二季，情況似乎未有明顯改變，工行(1398)、中行(3988)、建行(939) 及交行(3328)等四大國有上市銀行去年成績表已經全部派發。四大行成功頂住息差收窄帶來的巨大壓力，業績仍依能夠實現不錯的增長，去年淨利近3500 億元。其中工行淨利潤繼續佔據榜首，增長16.4%。

去年在適度寬鬆的貨幣政策之下，各大銀行貸款業務快速擴張，工、中、建、交四家銀行貸款增幅分別為兩成半到五成，雖然四大行貸款業務大幅擴張，但除交行之外，其他幾家銀行的大量信貸投放仍然未能抵消掉淨利差收窄給淨利息收入帶來的負面影響，不過各家銀行淨利差自去年三季度起已經開始呈上升趨勢。

炒上落搵辛苦錢

內銀股除咗業績，市場最關心係點樣籌資。現時建行以外，其他三家銀行都已經公佈了再融資計劃，有分析家認為沒有了這個不明朗因素後，未來推動銀行上漲的正面因素要大於負面因素。不過，茶友睇法有點不同，認為今年中央偏向着重防範金融風險，資金退市仍然主導市場大勢，對銀行業嚟講，仲係整固多過擴張，故此內銀股暫時概念上稍為失色，點都會影響到基金落注的興趣。

目前大市係21,000點樓上測試支持力，但好多股份價錢都唔算平，就算係三四線股，部份都升得唔少，相信基金經理呢一季仲係會玩換馬，沽出部份升幅已有的股份，跟住炒吓落後的績優股，譬如今個星期又有啲錢炒吓隻工業股葉氏(408)，至於早兩日熱炒的卓悅，宣佈業績有兩成增長兼派特別息，但股價昨日就趁好消息出貨，顯示炒家覺得個市未係出現大型上升浪，既然潮來潮去，就要抱住有胡即食的心態，咁樣炒上落市雖然搵錢辛苦啲，但如果扑得中，有時都會幾和味。