陸羽仁 - 財爺打謝地產股

雖然外圍表現不錯，美股繼續反彈，內地A股亦終結了連續四日嘅跌勢，但港股都係跌的升不了。恒指繼連續兩日勁挫750點，周二反彈約220點，昨日已經無力再上，下午兩隻重磅股中移動(941)、滙控(005)及中資金融股紛紛插水，恒指收市倒跌112點，收報21511點，再次失守20天線，期指報21428點，跌174點，比現貨低水83點。國企指數亦跌66點，收報12371點。

財爺昨日宣佈九招冷卻樓市，主要針對增加賣樓透明度，同時房屋局又宣佈主動推出兩塊靚地拍賣，增加未來供應，實行長短招一齊出。消息公佈後，地產股午後全線回落，長實(001)、新地(016)及信置 (083)齊挫逾2.5%。

冷飯暗藏辣招

今年初樓價急升，政府老大不願干預，擔心萬一出手打壓樓市，會撞正外圍爆發金融海嘯第二波，所以好多招數都被評為無料到。不過，幾個月來的發展，樓價上升速度不斷加快，而且議題不斷政治化，唔講外圍出現第二波海嘯機會係咪少咗，政府要解決不斷升溫的反地產商情緒，只有加大力度去打壓樓市。

有熟悉地產市場的老友話，鬍鬚曾推出的九招，雖然有部份係冷飯炒埋一堆，好似要求發展商要遵守商會的售樓指引，銷售現樓時，在樓盤內提供實地單位供公眾參觀，披露交易內容，但其中要求首張價單必須包括更多單位，開售前7日向公眾提供售樓說明書，必須在3日前公佈有關價單及準確提供樓宇地點及地址資料等，對地產商「擠牙膏」式的賣樓手法都有影響，假如未來再勒緊賣樓手法，影響就會好大。

茶友話，年初政府初初出招，包括代理在內的業界人士都猛唱政府措施無用。

他們心態可能真係覺得政策無用，也可能係想淡化影響，以免影響自己搵食，但通常做官心態都係咁，我出招你話驚，咁就大家收工，無謂搞咁多嘢，我出招你柴我台話無用，咁即係逼我落毒藥。

有業界曾經建議，政府想發出增加供應的訊息，可以一口氣推10幅地出嚟賣，反正以市場需求，食10幅地都仲頂得順，但咁樣就可以清楚發出增加供應的訊息。

茶友話，若然政府真係咁做，無錯增加供應訊息係好強烈，但最驚係股市同樓市跟住冧埋，最後連政府都要收檔啦！

大市餘震未了，資金續尋寶，半新股晨鳴紙業(1812)業績倒退，但股價炒上，有研究走勢的中環茶友留意到，該股同上日急升的汽車股華晨交投都熱鬧咗好多，似乎係有資金炒偏低。

晨鳴紙業炒浮面

晨鳴係內地大型造紙集團，面對內地市場競爭，解決制約本集團發展的原材料瓶頸，提高產品成本控制能力，打造「林漿紙一體化」的產業鏈，從而擺脫上游資源對公司的制約。致力於高端紙品的研發與生產，提升集團在國內及國際高端市場佔有率。

集團仲估計，隨着新的環保政策的實施以及造紙產業政策實施力度的加大，中小規模的造紙企業將會在未來發展中受到規模限制、經濟效益以及環保成本提高的三重壓力，必將導致整個行業集中度的提高，這將有利於規模企業的發展。由於公司去年金融海嘯期間上市，業績受經營環境影響，中期少賺近八成，剛公布的全年業績倒退兩成，反映下半年業績好轉，股價在「壞消息」下彈高，收報8元，比高位回落0.3角，但升幅超過10%，現在就要睇可唔可以浮番上水面。新股方面，隻昂納(877)好多人博炒，睇落似乎好熱鬧，借出孖展額已相當於公開招股超購約63倍，值得留意。

hightea@hkheadline.com