一周兩件：折讓吸引短炒渝港

渝港國際（613）揸住嘅中渝置地（1224），唔覺唔覺升咗唔少，但渝港無點郁過，一於炒渝港。渝港揸住中渝2.54億股，後邊中渝由5月低位到家陣，升咗35%，而渝港應佔中渝權益市值，上到7.77億元，甚至超過渝港本身市值6.8億元。渝港價殘之外，亦反映集團係中渝股票投資，帶來嘅潛在變現極之豐厚。又中渝呢期公佈售樓數據，單係上半年，已經累售22億人仔，大增兩倍。中渝賣樓成績好，股價有反映，渝港一樣受惠中渝嘅股價增值，家底亦自然水漲船高。再講，就算撇除呢個潛在增值因素，渝港最新每股NAV 0.27元，現價7.3仙折讓，講緊高達73%，本地磚頭股當中，渝港折讓好吸引。呢轉短炒，博渝港NAV折讓，真係係咁易收窄到65%，現價講緊要升近 30%，到9.45仙。

短打丹楓博升兩成

丹楓（271）短短3個月，累跌咗45%，現價0.74元同半年低位0.6元差無幾，相當低殘。又丹楓最新每股NAV 2.1元，仲未計紅山半島豪宅物業重秤，現價折讓高達64.7%，又係另一家超筍本地磚頭股。再講，同丹楓幾有同氣連枝味道嘅安寧（128），上星期五忽然過3千萬股成交，安寧有異動，丹楓應該追貼。呢轉短打，博丹楓升20%到0.9元，折讓仍高達57%。

錢雋