青心直說：撈底要理好醜

內地股市炒政策放寬，表面上好似有點海市蜃樓，因為銀監會表明唔會放鬆房地產調控力度，有報道指財政部正醞釀於2012年推行房產稅試點，配合經濟增長降溫，樓價未見隨成交量回落，就即係調控未達標，既然如此，又何來咁快鬆綁？

盡信圖不如無圖

市場開始炒「十．一」國慶，內地樓市會獲假釋，所以有買趁手。不過都要就住就住，話晒眼前手牌仍然「爛溶溶」，邊過膽敢放肆，隨時會累街坊無好下場，甚至再次觸動中央，以為你一心跟佢對着幹。

因此，縱使見有機構手影，資金按估值翻兜嘅翻兜，唔少被連日逐隻劏嘅都有啲鹹魚翻生，出現破底效應，試水式撈底亦玩神經刀，中、港、美股市好歹都已跌咗咁耐，透透氣都得啩！

有研究圖表走勢系統嘅行家就計過，原來過去一年按MACD、STC、RSI等輔助技術指標出入市嘅投機者，通通都要輸錢，盡信圖不如無圖，總之升破又走，跌破更要走。就好似紫金礦業（2899），冰凍三呎，股價大半年前已經跟唔足金價，滲漏事件只係導火線，但當股價跌至拋離10日線支持超過1成始見支持，形態上只是本着急跌後之禮貌式後抽，吊緊頸都順便唞番啖氣，可惜嘅係雖然弱勢已成，壞消息卻不斷，博大霧貪就手唔識閃，隨時撈底變「肴底」。

胡孟青

作者為獨立股評人