青心直說：下半年走勢欠睇頭

本港6月份失業率自去年中以來首次回升，但有人事部高層朋友竟然訴苦，指今時今日請人難，人工要求高唔在講，即使出得起錢，要成功「說服」80後的人才屈就打工才是最困難。

係真人真事，據講某大學精算系畢業生，一表人才，履歷當然一條龍名牌大、中、小學、幼稚園畢業，興趣才能多多，老闆打算請佢，合約都好有誠意地準備好，不料申請人竟然話要先拿合約回家給父母過目，氣得人事部友人頭頂冒煙，直衝廁所將冷水照頭淋。這個絕不是個別例子。身邊有朋友仔仔13歲已係N級小提琴高手，卻不懂怎樣剝荔枝皮！

呢批未來社會棟樑若生於今天美國，定當感受到今時今日找工作的壓力，絕非「人揀工」。即將周五公佈的就業報告，市場幾乎肯定失業率將由9.7%微升至9.8%，表面看來已唔開胃。

仔細睇現時的就業情況，即使製造業復蘇企業重新請人，平均55歲以上失業人士搵工時間仍長達34.4星期，與80年代的衰退比較，當時失業率最高達10.8%，但平均找工作時間只是4個月而已。

美就業未看好買股意欲低

由此可見， 大家見到新iPhone推出賣個滿堂紅，咪以為經濟復蘇的速度就好理想，實情復蘇之路仍很漫長。

因此，G20峯會內無人夠膽講退市，聯邦儲備局公開市場委員會議息後，亦指息率將維持低企。

以美國目前超過46%的失業人士已27個星期無工開來說，呢680萬勞動力正為企業提供前所未有的平價勞工，係畀美國休養生息，提高競爭力的大好機會，對一些低技術而勞工密集的行業，好似可口可樂呢類公司來說是一大喜訊。

要了解美國經濟遠比中國易，睇失業率、零售銷售、樓市及採購經理指數、加埋領先指標，基本上已有結論，而樓價往往與失業率掛鈎，一日未有大幅改善，投資者對買股票及基金意欲都唔大，市況難有大升機會。

即使喺香港，投資銀行界中人亦大吐苦水，指市況靜到就快隻蚊飛過係公定乸都睇得到。年初生意還可以，但近月市況無升幅亦無波幅，大客資金仍被牢套，新錢當然免問，唔少更轉投債市。的確，上半年債市回報係唔錯，已重回05年以來最高水平，意大利唔爆嘅話2019年到期國債都有4厘半，睇怕以現時市場資金情況睇，今年股市先低後反覆應該更貼切。

胡孟青