青心直說：民情不變樓價難跌

身處香港，買 H股只需㩒個掣，但要掌握公司背後嘅營運情況，除咗睇年報，仲要了解國情同民眾嘅消費模式。就以內地樓市為例，點解民眾一邊話貴，一邊又不問價追入？假日閒來煲碟睇《蝸居》，竟然搵到答案。故事環繞一對中產夫婦嘅房奴生活以外，仲透過其他角色影射前上海市秘書秦裕，同前上海地產主席周正毅，單睇牌面已充滿娛樂性。呢個發生喺虛構城市「江州」嘅小品，打動咗社會上下，更成為兩會期間官員嘅熱話，有兩個口嘅都紛紛話要睇吓了解民情。戲假情真，但所思所想都係內地大部份人心中寫照。當主角夫婦討論點解死都要買樓時咁講︰「我們這些人，鈔票不能留，金銀財寶又沒有，只好買不動產，讓房子保保值。」佢哋為買樓籌備咗好幾年，樓價一路升儲蓄就一路減，面對上車遙遙無期，諗住高追時咁講︰「負債就要跟世界接軌，消費要向歐美看齊、收入要向非拉看齊，這叫全方位地立體接軌。」
下一步整頓地方政府財政

簡單幾句說話，道出內地樓市只升不跌嘅關鍵，就係觀念問題。觀念係不理智嘅，根本唔睇供求關係、市民負擔能力。中國城鎮化步伐一日未慢落嚟，人口仍會不斷往大城市流，房價不能不漲，即使中央落藥打壓，效果亦只係暫時性。全國城鎮地方融資平台嘅負債由 08年的萬多億元（人民幣．下同）急增至去年 6萬億元，主要係金融海嘯下，地方政府要 Good水，以旗下公司大力融資發展項目，據統計全國就有 3000多間呢類公司，七成以上係縣區級平台公司。中央先叫停 78間央企地產項目，北京突然宣佈唔再以「價高者得」方式投地，擺明扯白旗投降，有理由相信下一步係逐個地方整頓，以行政手段逐步落實收水退市。今個星期多隻內房出業績，業績唔會差，但由於中央出招打壓，股價未必大升。若投資者認為內地人買樓嘅觀念未來幾十年都唔變，內房股每跌至較低水平就應該吸。胡孟青