陸羽仁 - 借啲勢玩夾上

股市呆得耐會郁，唔係向上郁，就係向下郁，因為大家太唔習慣個市會郁，所以一郁會夾死人，昨日就係一個好例子。

美國聯儲局前一日議息，決定繼續在「較長時間內」維持利率不變，但聯儲局議息後的聲明都走少少光畀大家睇，投映出一幅美國經濟緩慢復甦的圖畫，例如講勞工市場，上次儲局議息後的聲明話「衰退放慢」，今次講「穩定中」；又例如企業購買機器和軟件，上次話「看來增長中」，今次話「明顯增長」，英國《金融時報》認為儲局對美國經濟改咗口氣咁話。美股上日溫和地向好雖然標普500指數上咗17個月高位，但升幅唔太大，杜指亦係升咗44點。

儲局睇好經濟

港股開市早段反應溫和向好，升咗100零點開市，叫做跟住外圍走，近排港股都唔係跟到咁足美股向上，所以升100幾點大家都以為差唔多，跟住10點幾個市又上上落落，過去三日玩上落好多時玩玩吓變玩向下落，老散見個市升唔得好多，有啲發軟蹄的感覺，唔少人就出手去沽佢，諗住食番100零點搵餐茶。

個市在11點9左近就嚟料，失驚無神抽上200點有多，昨日早上見無料到走去沽的老散，係咁就打晒靶囉。恒指及國企指數齊齊收復10天移動平均線，恒指午後曾一度大升逾420點，之後略為回順，但仍收在高位，收報21384點，升361點或1.7% ；國指更勁，收報12231點，大漲291點或2.4%！大市成交亦配合，成交金額659億元。

升市之後，大家自然要搵個解釋，聯儲局聲明自然係最好的解釋，不過解釋唔到點解一開市唔大升到11點幾後才急抽。又有人話係內地股市升帶起香港，不過睇番內地個市，滬綜指升2%，升幅略多於香港，但佢升得「正常」好多，反覆向上，唔似港股突然抽上。中環茶友話，如果夾硬要加一個解釋，就係儲局聲明本來利好，但大戶唔一開市就抽，升少少炒吓上落，引得一班老散以為又係重演兩日的呆滯市，到老散上晒車去沽，才一舉夾高，係「玩夾上」，玩死你。

老友呢個陰謀論講得幾圓滿，真唔真就唔知啦，不過昨日咁急咁上，做淡的散戶根本走唔切，後來被逼升到高才可以平倉，或者真係好多人做淡，一夾上單係平倉盤都推高200幾點都唔奇。無論如何，大市抽升兼成交向上，期指轉番高水，美股又在呢個星期尾季度期貨期權結算，炒上機會大啲，暫時都可以睇好少少。

新世界未見高位

地產股輪住派成績表，新世界發展(017)公布至去年底止中期業績，虧轉盈賺53.5億元，每股盈利1.38元，派中期息10仙。上年同期虧損9.9億元。基本溢利增83 %至18.6億元。新世界在去年下半年期內香港物業銷售額約為6億元，貢獻主要來自海濱南岸及衛理苑之銷售，賣樓唔多。

董事總經理鄭家純都對樓市睇得幾好，話全球多間央行推出刺激經濟方案推動經濟，流動資金充裕，加上低息環境，造就對幾乎所有行業都利好的環境。

香港的住宅市場表現強勁，09年的一手成交額達1.6萬宗，按年上升46%，09年底曾出現短期放緩跡象，但佢估低利率、流動資金充裕及土地供應量低企這三個因素，可在短時間內再度推動市場。

樓市係咁，政府嚇吓又停吓，過一排又炒炒，政府又嚇又停吓，地產股亦受影響，樓價都做咗幾次天價，股票都未有天價。以新世界為例，一年高位係去年8月的18.96元，昨收15.54元，距離高位仲有18%，去年炒得太快，如今仲捱緊價。