陸羽仁 - 跌的升不了

昨日市況，套用陳總講法，升的跌不了，跌的升不了。

近日港股大勢落後，最明顯係前日借住印度加息，港股一插插低400點。本來印度加息，其他市場反應相對平靜，個別亞洲市場仲不跌反升，但香港就大力插低。到周一晚美股再度上升，創出金融海嘯後新高，恒指叫做應景彈一彈，但到下午升幅就不斷收窄，最後更以全日最低位收市，20天線最終都係失守。恒指升幅收窄至54點，收報20987點。

美股出現非「劇本」升市

睇番港股連續兩日表現，大戶似乎係想㩒低指數結算，所以有壞消息就大力插，跟住美國出現同「劇本」唔一樣的升市，大戶鬆一鬆手等個市彈番 300幾點，等你買到有點後繼無力，先至出手插你，咁即係話，大戶要你跌，你就升不了，就算勉強升得到，跟住都係玩唔耐。尤其昨日大市成交只有536億元，大戶舞上舞落仲容易。

港股昨下跌，同內房股回落有關。日前國土資源部副部長要求，各地在今年住房和保障性住房用地供應計劃沒有編制公佈前，不得出讓住房用地，並要加緊研究解決變相炒地和上市房地產公司土地監管問題。

另外，各地從今年3月開始到7月底的5個月時間內，要全面清理查處房地產開發中閒置土地、囤地炒地、向別墅供地等各種違法違規的用地，同一時間，上海再宣佈收緊地產商支付地價的限制，反映壓遏樓市措施，華潤置地 (1109)跌5%。

有個鍾意買新股的中環茶友話，買股不能只睇指數，係上落市中，仲有好多股份有升幅，只要個市反彈的日子，每日都有幾十隻股份創新高，扑得中依然有搵錢機會。二三線股份勝在上落快，跌市之日撈貨，升市之日隨時可以收割。

上落市炒中型股搵食

茶友話，近日當炒二、三線，好多都同內需有關，一類係藥業股。內地要力谷內需市場，有估計十年內中國會變成全球消費大國，各類消費產品市場都會快速增長。你會發覺，近年上市新股，好多都同消費有關，好似體育用品股，而且上了市的公司，普遍業績都唔錯，仲有就係鞋股同男裝股。

講開男裝股，現時市場選擇不多，去年兩隻男裝股利邦(891)同利郎(1234，見圖)都大受歡迎，利邦係香港馮氏家族持有，專做外國品牌，上市至今累積升幅以倍計，另一隻利郎係內地品牌，招股時反應不算太熱，但掛牌後表現相當對辦。集團剛宣佈業績增長逾九成，但股價在業績宣佈後好消息出貨，短期可能要打吓底。

內地要加強醫藥改革已經好耐，措施逐步落實，故此藥業整體走勢不俗，龍頭股國藥(1099)上市時個個話貴，但至今累積升幅接近一倍，中籤者持有至今，收穫相當不俗。其他藥業股好似廣州藥業(874)、金衛醫療(801)等都向好，聯邦製藥(3 933)業績後獲大摩升評級至買入，股價昨日飆升21%。

藥業股一向慢熱，茶友話，現時美國醫療法案通過，對藥業有正面影響，唔知會唔會令基金對藥業興趣增加。呢兩類股份昨日升市本來殺咗上去，下午跟住鋤番低，散戶若夠手急眼快，上上落落又搵餐晏。