青心直說：開心樂園餐背後玄機

「麥當當」能俘虜全世界小朋友，咪以為係因為易食上癮嘅油炸食物，佢最成功係為小朋友帶嚟歡樂氣氛。唔好睇小開心樂園餐附送嘅玩具，喺小朋友心目中，比薯條更吸引。市場有疑似麥記出沒，賣大包加派息兼派紅股。 2月底提過炒業績博彩星集團（ 635），貪佢年年派高息，旗下豪宅商廈租金回報高，果然冇令人跌眼鏡，唔怪老細明刀明槍密密增持。喺物業重估收入帶動下，去年轉虧為盈賺 2.39億元，每股盈利 1.09元，歷史市盈率 3倍唔夠。 2月底叫買時，股價仍係 2.5元，兩倍幾 PE已係好低，家派埋紅股，當時小注博入咁有耐性嘅投資者應該相當開心，好過炒來炒去得個桔。呢次肯派咁多，主要係大股東持股近 43%，益自己順便益埋股東，中期股息 5仙另加二送一彩星玩具（ 869），每股實收 4毫子有多，相當於現價一成幾，睇落非常吸引。睇番過去幾年部署，呢次集團選派股兼派息套餐，可能另有原因。
彩星似鋪路私有化

公司喺 08年頭重組，削股本十合一，分拆彩星玩具以介紹形式上市。當時彩星集團仲持有彩星玩具約 55%股權，加埋大股東就共揸約 67%。成功分拆後，彩星玩具業績走下坡，相反阿媽由於坐擁大量優質物業，包括半山麥當勞道及廣東道彩星大廈等，資產質素越嚟越好， 08年即使仲係勁蝕，仍發五送一認股證。今次純係物業重估收益帶動下大賺兩億幾銀，公司選擇唔派錢派彩星玩具，令集團喺 869嘅持股量減至 51.45%，計埋認股證悉數行使，進一步降至 49%。去年玩具業務稅前仍蝕逾 4500萬元，反而物業等投資就進賬 3.4億元，計及物業重估，佢嘅物業約值 18億元有多，負債比率不足 15%。公司資產淨值逾 19億元，除開兩億幾股，每股資產淨值成 8.6元，現價有六成幾折讓，我係大股東都想將佢據為己有啦。呢次派股唔派錢，一來可慢慢減持彩星玩具方便私有化；二來大股東轉手又可以攞番彩星玩具嘅股權，真係好似開心樂園餐──有得玩、有得食。胡孟青