魚缸暴炒族：慶鈴績優 先試 2.5元

汽車股去年表現不俗，炒上理由都係受惠中央力谷內需，去年只要散戶捉到呢個勢，炒汽車股應該賺到唔少。汽車下鄉政策今年繼續，令呢類股份有望成為跑贏大市一族；照咁睇，汽車股仍係股海焦點之一。不少內地車廠近年都動作多多，以配合內地相關受惠政策，好似剛公佈全年業績的慶鈴汽車（ 1122），近年集團戰略轉變，以低價產品帶動銷量增長，所以業績都算理想，去年純利上升 38%至 2.41億元人民幣，業績普遍比外資行原先所預期好。雖然以低價或減價促銷，會令毛利率下跌，但慶鈴可繼續透過提高生產率，以保持盈利能力。慶鈴宣佈派末期息人民幣 8分，相比 08年度增加六成；公司截至去年底手頭現金達 53億元人民幣，並無借貸。業績公佈後，慶鈴股價由 2元邊緣重拾動力，上周五升 2.9%，收報 2.11元。慶鈴應冇咁快升完，伺機買入，目標先睇 2.50元。方星俠