陸羽仁 - 出晒衰嘢有得升

通常興奮過後都有啲頭痛，港股都有啲咁情況，上一日港股經過大抽升的刺激後，昨日又好似漏咗氣一樣，無跟美股創新高，反而跟住日股回落。恒指收市略為回穩，收報至21331點，微跌54點；好消息嘅係恒指10天移動平均線升穿50 天，出現「黃金交叉」的利好後市走勢。

中移動 (941)近期係弱股，自從上季業績不如理想後，首次出現盈利按季下跌後，佢就反覆下挫，去年底見過69元的低位，近日雖有反彈，但係反彈唔係咁有力，大家都等佢公佈業績。

中移動生意難做

結果中移動業績昨午揭盅，業績符合預期，2009年全年營業額4521億元，增長9.8%，未計利息、稅項和折舊的收益(EBIT-DA)增長5.9%。全年純利1152億元，較08年增長有2.3%，係10年以來增長最少嘅一年。每股盈利5.74元，派末期息1.46元。

09年中移動客戶總數超過5.22億戶，增長14%，純利追唔上客戶增長，證明每個客戶收入下跌，中移動財務總監薛海濤話，去年平均每月每戶收入(ARPU)由83元降至77元人民幣，皆因低端用戶的數量持續增加，相信未來趨勢將持續下跌。

中移動的每戶收入減少，其中一個原因係要大增手機售價補貼，和推出高速網絡的對手競爭，因而增加開支。董事長王建宙表示，去年手機補貼約117億元，其中 50億元補貼於國產3G手機TD-SCDMA，預期今年手機補貼155億元。換言之要補得更多。

綜觀中移動全份業績，雖然未來挑戰仍大，但稍稍令人放心是去年第4季有輕微增長，拆開第4季條數來睇，淨收入達312億元，去對上一年同季微升3.3%，起碼叫做止住季度盈利的跌勢。可能就係因為咁，也可能因為早前壞消息已盡出，所以公佈業績之後，中移動反而由早上跌1%，變成下午升1.1%。平情而論，中移動高增長的日子已過去，以後生意都難做，但勝在出業績無嚇親人，股價就有啲反彈。

中海外未來毛利應升

你睇內房巨股中國海外(688)的情況就剛好相反，09年盈利增長OK，但大家對佢期望太高，上個月又一直後低位炒番上來，出業績見不外如是，見好消息出貨，股價反而跌1.6%。

中海外公佈去年純利升48%至74.7億元，較08年同期的50.49億增長48%，每股基本盈利0.916元，派末期息每股0.13元。

睇番中海外的數字，生意做大了差不多一倍，但純利只升48%，睇嚟在內地做房地產都唔係執金。內地房地產開發毛利率只有31%，可能係08年樓市唔係咁好景時薄利多銷賣了樓，到去年才入帳，如果咁睇，反而係好消息，因為到09年開始市道好轉，賣樓的利潤率會提升，那時土地成本又較便宜，所以今年入帳的毛利率可能會好啲噃。

要留意係日有消息內地管理層針對央企高價投地，控制央企參與經營房地產，好似中海外呢類攞正牌做地產的央企不受影響，民企亦都會成為阿爺整肅央企的得益者，有關股份可能炒勢炒炒。至於長遠係咪真係好處咁大，就好睇阿爺落實政策的力度，因為大陸企業最叻係上有政策、下有對策，尤其國企最精於此道，如果做地產咁好搵，好多央企老總都唔會咁隨便放棄肥豬肉。