陸羽仁 - 兩個大泡泡

周末看到商品大王羅傑斯接受CNBC的訪問採訪，發現他對黃金和中國房地產的評價，挺有意思，值得一書。

訪問的焦點從羅傑斯睇好的黃金開始，近日美元反彈，商品稍稍回軟，黃金從高位回落不少，羅傑斯有此評論：「我絕對會持有黃金，但黃金去年的走勢超強，所有升得咁急、咁快的東西，回吐吓，唞吓係好正常，如黃金跌多啲，我希望我可買番啲。各地政府都將自己的貨幣貶值，終有一天我們要把所有投資都放在實物中。從所有基本因素看，美國國債並不吸引。黃金和原油早前升得太厲害，好自然會調整，我係一個非常糟糕的短線投資者，所以估唔到商品價格聽日會點，但升得多調整吓都係好正常。當我哋見到原油和黃金愈來愈多炒作時，最好企埋一邊，等人地去炒；我鍾意買便宜點的東西，如以歷史角度講，白銀平過黃金，天然氣平過原油。」

香港樓市榜上有名

CNBC追問羅傑斯?家有乜泡沫時，佢答謂：「美國國債係一個大泡沫。中國沿海城市的房地產也是泡沫，中國政府正在討論如何為房價降溫，希望她會成功。香港的地產亦都瘋狂，部份亞洲國家的地產現在都瘋狂。除此之外，我見唔到有乜泡沫。」主持人似乎對中國和香港房地產無乜興趣，所以就無追問落去，但羅傑斯向來較睇淡美元美債，認為美國政府狂印銀紙發美債，製造史上最大的債券泡沫，如今將內地樓價和香港樓價與美債這個大泡沫等量齊觀，可見佢都認為內地和香港樓價升得太癲。

羅傑斯仍然極度看好中國的長線前景，在各種貨幣中，唯一是看好人民幣。佢話：「你可以的話要買人民幣，它會長線升值。在未來幾個世紀，人民幣匯價會雙倍、三倍，甚至四倍於現今的幣值，就如日圓在過去幾個世紀那樣，兌美元升值四倍。」佢認為中國明白長遠要有高度自由浮動的貨幣，他們知道要去改變。當人民幣自由浮動後，北京就不能再管理匯價。但不斷向中國施壓對人民幣升值毫無幫助，你不能一邊打人一巴，一邊叫人做嘢，你要讓人有面子，他們就會做啲嘢。

你可以話，羅傑斯仍然係一個中國大好友，但這是一個投資幾個世紀的長線觀點，佢認為你唔好指望中國經濟可以挽救世界，中國在過去的確是儲了好多錢，以備不時之需，但金融海嘯已是不時之需的日子，中國亦用咗好多錢救市，唔好期望中國會不停泵錢甚至帶起世界經濟，而他亦認為中國沿海城市和香港地產有泡沫。

這裏插少少講乜嘢叫泡沫。泡沫也者，就是虛升，是脫離基本因素的急促上升。

有泡不等如即跌

中國經濟雖強，但沿海樓市不斷急升，有些新樓價錢比去年初係成倍咁升咗，雖然二手樓無咁厲害，但沿海大城市樓價升得咁急咁快，想話佢無泡都唔得。至於香港，雖然不少九龍、新界樓還遠未到97年的價位，但係新樓、特別係港島新樓好多都以天價開售，至於天匯啲6萬、7萬蚊一呎樓就更出名啦，羅傑斯在新加坡睇彭博新聞都會睇到，自然覺得香港有個大泡泡。

大家要注意，有泡不等如即跌。從短期走勢來看，有泡的東西，個泡會愈來愈大的機會多啲。以樓市為例，樓價升得太急，政府會出手干預，樓市會停一停又再去，政府又再干預，直到干預到個市停為止。所以政府干預樓市的力度，唔係太多，就係太少，好少有啱啱好，初時都會比較細力，大家都覺得佢無效，所以話某些資產市場有泡沫時，唔等如這些東西會即刻跌，反而多數會反覆升一段。

講番羅傑斯，佢對全球經濟仍然睇得幾淡，覺得今年底明年初會出現貨幣危機。歐美各國都發債太多，借貸太多，所以係製造緊危機，佢亦唔睇好最近歐盟救希臘的方案，認為救希臘是衰多過好，因為希臘從來無好好管理財政預算，而家亦都唔會，所以救完仲衰。

恐貨幣危機重現

按成立歐盟時訂立的馬城條約，成員國要把財政赤字限制在本地生產總值的3% 之內，但結果大部份國家都無遵守要求。羅傑斯話，幾年前法國搞出好欺騙性的財政記帳方式，即使用咗幾十年欺騙性記帳的意大利，見到法國搞到咁荒謬都唔敢學，這就是歐洲的財政實況。以希臘的問題為例，佢認為不應救她，應任由人家拒絕貸款俾佢，甚至逼佢破產，希臘先會好好管理佢的財政。歐盟救助希臘，將會削弱歐羅的基本面，會從內部削弱歐羅。佢對歐羅是短期睇反彈，長期看淡。佢認為歐羅作為一種貨幣不大可能長期存在，英鎊在未來幾年將大幅下滑，歐羅在未來 15至20年內可能會結束。但佢認為歐羅沽盤太多，在近期可能先有反彈，唔係叫大家馬上沽。

避開泡沫貴價樓

羅傑斯認為，歐美本身已借貸太多，?家用借更多錢的方法去解決問題，自然愈搞愈弊，一次貨幣危機會在今年底或明年發生。雖然羅傑斯無明言佢所講的貨幣危機係乜，但暗示美元大跌和超級通脹可能在明年到來。現時的復甦(美元和美股)只是因為2008年大跌後，人們在2009年開始要買番嘢，所以導致大幅復甦，「若債務和消費有問題，點可以用更多的債務和消費去解決問題？」好多人講雙底衰退，係怕美國以至世界經濟唔係咁一帆風順地復甦，羅傑斯就係講緊類似的危機。但佢唔係短線的事，而係講今年底明年的事，所以唔好睇完篇文馬上今日去沽股票。不過亦唔好當羅傑斯無料到，佢做對沖基金出身，唔好以為佢主要短炒，其實佢較專長睇宏觀大勢，睇到有重大制度缺陷，然後落重注去買跌。

歐美兩國負債太大，歐羅機制又有重大制度缺陷，呢啲就係以前巨型對沖基金出擊的黃金時機，至於各地政府能否解決制度缺陷，抑或令缺陷加大，就係下一波危機會否爆發的關鍵。未來難以預測，但我對長期投資者有個忠告，若你唔係想短炒圖利，就最好避開泡沫高漲的市場，嗰啲6、7萬蚊一呎啲港島樓，或者成萬蚊一呎啲新界樓，都係避之則吉啦。