陸羽仁 - 股指期貨谷高內地市

港股昨日受美股和內地兩方面好消息夾擊，推升股市，但真正對港股有推動作用的應該是內地市，內地市沉咗好耐，昨日有番啲起色。內地上星期五宣佈股指期貨(即係香港期指)於4月16日上市，上周五內地股市已經上升，但成本未跟上，到昨日開始發力，成份股全力搶高，上證綜指突破60日均線，好快上穿 3,100 點關口，隨後略回，但最後仍高收，滬綜指以報收3,123點，上漲64點。

其實內地推出股指期貨，本屬利好，不過講咗咁耐大市無升，大家又當無件事，到?家落實推出時間，大約個半月就推出，個市開始有番少少熱度，真係正常過正常，內地人鍾意炒，整期指俾佢炒吓，自然應該炒到飛沙走石先至係，問題係幾時開車而已。

A50成交激增

內地股指期貨跟滬深300指數，貪佢成份股夠晒多，唔係咁易操控，所以如果睇好內地股指期貨會帶來炒風，按理炒滬深300指數基金最正宗。香港人炒慣隻安碩A50基金(2823)，佢只追蹤50隻內地股，但港人愛買佢，所以成交比較多，但追蹤滬深300指數的反而是標智滬深300基金(2827)，結果昨日隻A50基金升咗2.2%，成交有18.8億元，比平日多咗一倍，但隻滬深300基金升得多啲，升2.7%，但成交只有1億，散戶唔太介意成交，炒滬深300基金可能追得貼內地期指多啲。

市場另一焦點係內銀股，建行(939)周日公佈業績，受資產減值支出減少及手續費和佣金收入增加提振，去年淨利潤1068億元，增長15%。符合市場預期，同時未宣佈任何補充資本計劃。

最早上市的建行資本消耗時間最長，本應最早有融資需求。不過，建行在去年的信貸競賽中，新增貸款總量在四大行中排名第四，加上建行去年分三次累計已發行了次級債，一定程度上緩解了再融資的壓力。據知情人士透露，建行可能會以非公開形式發行超過人民幣400億元的A股，還可能考慮在香港市場供股融資。雖然有集資壓力，大行普遍睇好建行前景。高盛、大摩及花旗都給予「買入」和「增持」評級。

炒家續落注三線股

建行、昨日上升1%至6.15元，與大市同步，其餘「六行四保」除民行(1988)逆市跌0.3%外，都有不錯的升幅，其中國壽(2628)、平保(2318)、中行(3988)、招行(3968)及中信銀行(998)都升約2%。

講番港股，在兩大利好推動下，特別係內地久久唔郁的股市開始郁，港股就真係唔叫做升得多，最高曾升到21,318點，但最終全日收報21237，升184點，成交額546億元，仲係偏靜。期指今日結算，料有一番角力。

係大市爭持下，投資者繼續炒股不炒市，中型股好似隻卓悅(653)業績前繼續上升，昨日升上10.48元新高，再升近7%，另外曾入股內地房地產公司的蜆壳電器(081)忽然爆升，似乎仲係有資金尋找偏低的三、四線股。