青心直說：家電下鄉近水尾

家電下鄉炒足成年，個個話今年仲係炒呢個概念，我話未必。財政部早於 07年已打算喺山東、河南同四川 3省試行，只不過咁啱遇正金融海嘯，短時間內無計擴內需，惟有搞大佢。一年試行夠鐘，係時候計吓數。根據非官方調查，全國去年共售出 3767萬台家電下鄉產品，銷售額 692億元（人民幣．下同），遠低於目標 1000億元。國家今年決定加大力度，補貼計劃最少推行到 2013年，目標拉動家電銷售 5000億元。但第一年成績已較預期有咁大出入，點叫人對呢 5000億元目標有憧憬？即使有國家補貼，農村消費力又係咪好似市場睇得咁樂觀？以江蘇省呢個全國人均收入第 5大省為例， 08年省內農民人均收入係 7356元、生活開支 5328元，一部 21吋彩電（ 600幾蚊）已經係全年開支嘅十分一。分析員同大行日日話家電下鄉有排炒，但觀乎農民收入增速，睇怕要買埋冷氣、雪櫃甚至電單車至夠數，恐怕要頗長時間。
利錢低冇肉食

即使中央力撐，今年銷售仍面對極大挑戰。西南大旱災，貴陽市 200幾日冇雨落，農作物失收生計成問題，邊有閒錢買家電。其次，農村基建未配合，湖北省全省兩成村落根本未接通公路，農民出城搬電視回家，隨時補貼金都蝕凸。此外，農村電力不穩定，冷氣機買返嚟隨時變成裝飾品。喺零售商角度，下鄉係雞肋生意，根據國家統計局陝西調查隊報告，下鄉產品毛利一般最多 10%，扣埋燈油火蠟運輸所餘無幾，賣一部 21吋電視利潤只得 6蚊，零售商點會有心機做。概念雖是強弩之末，市場依然熱情。專營東部三四線城市零售嘅滙銀家電（ 1280），大本營喺江蘇，市場當正佢係家電下鄉股炒，首日狂升 44%成新股王， PE炒到近 25倍。但當佢係家電下鄉股確實表錯情，因為去年來自下鄉產品嘅銷售只佔公司整體 6%。堅持要炒下鄉水尾嘅朋友，唔阻你發達，但炒時炒，上游威靈控股（ 382）相對抵買啲。胡孟青