青心直說：巴斯光年係真正太空人？！

英國有調查訪問咗 1000個中、小學生，竟然有一成人話首個登陸月球嘅係巴斯光年！即時令人諗起香港部份小學生覺得橙係冇皮、蘋果係一粒粒嘅，原來都只係小兒科。呢個習非成是嘅例子，放喺投資市場就好易輸錢。正如大炒家一口咬定人民幣要一次過升值，資金不斷湧入驚死蝕底，點知溫總當頭棒喝，炒升值熱錢即時打退堂鼓，轉炒業績買騰訊控股（ 700），睇好佢嘅 QQ正係為新一代洗腦。騰訊噚日逆市狂飆，業績前開車，老散會擔心好消息出貨。但想出貨都要有貨先得，佢每日升啲升啲，街貨一直唔多，噚日一嘢挾起，無論貼價定價外輪通通「劈髀」，因為原來連發行商都冇做足對冲，升唔到畀散戶食糊。阿里巴巴（ 1688）今日派成績表，若佢因為淘寶而有驚喜不妨追入，因為佢都未炒過。不過若淘寶唔多掂，就要諗諗沽埋騰訊，因為當經濟好轉，「購物上淘寶、批發上 1688」，假如青年人用嘅淘寶都唔得，你覺得騰訊會好得去邊？
習非成是易出事

除咗炒業績以外，係時候留意新政策。兩會開完，內地即賣地，北京朝陽區又創新地王，遠洋地產（ 3377）以超過 40億人仔投得，每方米樓面地價兩萬七。由此可見，樓照炒、股照買，利好政策將搶閘推出，低碳經濟應係重點。比亞迪股份（ 1211）又話短期有補貼政策，仲拉埋太陽能同儲電站上身話要大搞，擺明要扮新能源股 Good水。魔鬼又係藏在細節中，公司去年賣咗 45萬部車，但今年銷售目標反而僅 80萬部，只加 70%左右，較 03年進軍汽車市場時，年年目標要 Double-Up差好遠。汽車銷售已佔佢營業額五成，當中全部都未係電動車，原本話 3月喺深圳試用電動的士，到家都只聞樓梯響，睇吓拖到 4月又點。仲要留意電動車未行已欠人一身債，打入美國市場好好聽，但車未到先打三十大板，成立銷售總部、同戴姆勒等合作又要用大量資金，單計一年內到期短債過百億元，集資需要不得不防。胡孟青