青心直說：炒濠賭股小心短癮

中美就人民幣升值爭拗升溫，國會議員呼籲將中國列入「滙率操縱國」，火藥味增加，小心擦槍走火殃及池魚。資金明顯流出區內，之所以美股繼續破頂，但中港股市冇運行。投資者唔好見一支陽燭便興奮，市況稍現突破，但短線震盪難免，高追易吃眼前虧，宜先小注，待較明顯嘅入市訊號先出動，實行「溝上唔溝落」。市場冇焦點，轉睇大行報告。瑞信出連環拳，詳細分析澳門股前景，最睇好澳博控股（ 880），目標價 6.80元，似乎信心十足。仲牙擦擦話自己係最早轉軚睇好澳門賭業，相信其他行嘅分析員隨後都會改觀，皆因死硬派都敵不過股價升勢，迫住要調升盈利預測。睇澳門賭業，其實唔使翻箱倒籠睇晒咁多隻賭股業績，親身過大海賭兩手，觀察吓地頭蟲同外資嘅生意，留意內地客喜歡去邊就知。賭業好，澳門好，新任行政長官向市民大派每人 6000蚊，又加快建公屋，水頭充足反映博彩稅豐收，單係 2月就超過 134億澳門元，按年增長約 70%。
慎防星洲撬客

最新嘅市佔率順序係澳博佔 32%、金沙中國（ 1928）佔兩成，永利澳門（ 1128）及新濠博亞分別佔 15%及 14%。即係話，超過八成市場份額已被呢四大財神搶佔，當中何氏宗親會加埋近五成，反映外資隊始終係旺丁唔旺財。內地平民客一般至愛金沙、威尼斯，大孖沙豪客就心繫新蒲京。猛虎不敵地頭蟲，美高梅都決定放棄美國大西洋城業務，棄暗投明投奔祖國懷抱，並有機會喺 8月來港上市。報告及行業前景一面倒看好，似乎睇漏咗新加坡嘅競爭。今年情人節加元宵，當地史上首間賭場開幕，政府希望靠娛樂事業令旅遊業翻生，計劃未來 10年，將入境人次提升到平均每年 1700萬人，每年經濟收益超過 300億美元。單係賭場目標就要每年入場人次有 1300萬，當中兩成以上會係中國內地遊客。澳門 1月內旅客佔整體 55%，達 113萬人次，雖然目前贏新加坡成條街，但隨着當地包括環球片場等投入運作，對內地高消費嘅家庭旅客有頗大吸引力。胡孟青