青心直說：缺點變賣點的絕妙宣傳

美國近期有一股惡搞歪風席捲全國，大學生酗酒向來都係嚴重的社會問題，近日更興起一種叫「Icing Game」的整蠱遊戲。意思係無論喺任何時候任何地點，當你收到一支Smirnoff Ice酒，就要立即跪低扮求婚咁款飲晒佢。無論係考試前、打波後、還是開緊會，都無一倖免，來者不拒。

呢個咁無聊嘅遊戲，本來唔應該有人會玩，但最頂癮嘅地方，係若你身上有另一支Ice甜酒，就可以出手「Ice Block（還擊）」，被人Ice番轉頭偷襲的朋友就知「捉蟲」，要將兩支全部飲晒。

呢個來歷不明的無厘頭遊戲，竟然極速於美國各地擴散，連Facebook創辦人、全球最年輕首富朱克伯格（Mark Zuckerbery）都有試過，當眾Ice佢嘅生意拍檔（發明Firefox的Blake Ross），該片段被放上網後，名人效應令更多人認識呢個遊戲，睇怕遲早有本地啤酒商偷橋。

病毒營銷越來越流行

美國幾個大學重鎮的Smirnoff銷量大升，社會聲音質疑到底幕後的始作俑者會否係啤酒公司Diageo自己。公司隨即發表嚴正聲明，話絕無策劃此事，指出會盡一切努力杜絕有人不當使用公司品牌。奇就奇在當公司發出聲明後，當地最受歡迎、專介紹Ice人妙計的網站竟然突然關門大吉。

到底是否公司的宣傳手法，大家心中有數。能夠將產品變為大眾文化，絕對係病毒營銷（Viral Marketing）的成功典範。呢款飲品本身人氣一直在跌，雖有多款口味，但款款勁甜似藥水，男人一向好少飲。透過呢種整蠱遊戲，成功將產品的缺點變成賣點，連平時唔會買嘅消費者，為求自保都買定一支傍身，於是酒商賺個盤滿缽滿。

病毒營銷越來越流行，因為佢成本低、效率高而且動員能力強，但比起一般傳統宣傳策略，需要更絕的「橋」及仔細的部署。

本地業界似乎還未掌握未來廣告大勢，目前仍只停留喺某某藝人話呢隻產品好用，或喺電視劇中放幾盒紙巾同幾罐汽水咁。網上社交世界正蘊藏無限可能性有待發掘，又點止係畀股票冧巴咁簡單。

胡孟青