陸羽仁 - 新盤去貨 樓股郁番

半年結在即，即月期指今日結算，但港股昨日仍然得個悶字，成交縮番到450 億，中午打電話俾經紀張，佢把聲直情好似瞓咗咁，因為講嘢講得少把聲唔開。經紀張話，恒指表面睇反彈得唔錯，但個市都唔見有錢在炒，三四線股仔全部唔郁，散戶唔潛水就怪。

地產代理新盤難做

中環茶友話，常言話悶聲發大財，但如今大市雖然在近期高位牛皮，但活動甚少，悶就夠悶，但邊個能夠發大財？好似無噃，遲啲農行(1288)上市，散戶都未必有好大反應。呢個市能夠發財的只是沽期權者，即係窩輪發行商，大市係咁頂住，跌唔到，又升唔起，散戶連輪都唔敢炒，呢排「縮窩」(波幅收窄令價格下跌)都輸死人啦。

昨日唯一有啲景的係地產股，地產市場似乎在慢慢消化政府「九招十二式」的影響，信和置業(083)牽頭發展的奧運站樓盤帝峰‧皇殿開賣，事前話代理收得好少票，點知開賣就去清，上周末不足3個半小時沽清231伙，下一批單位最快明天推出。新樓去到貨提升了地產股人氣，信置漲2.2%，至14.68港元。

帝峰‧皇殿去到貨，有不少買家唔係由代理帶入場，而係自己上門，顯示政府「九招十二式」要發展商事先公佈價單，對過去新樓開售全部由地產代理帶客上門的模式，有好大衝擊，未來發展商買樓方法會慢慢變，唔再靠咁多代理，行番舊制由發展商直銷都得。無怪乎美聯(1200)大老闆黃建業早前趁住股價上升，大手減持8.2%，令自己持股跌到5% 咁少，美聯變成一間公眾持有的公司。呢啲咁大變化，都可算係地產代理業的範式轉移啦。

講起範式轉移，內地電訊業都有啲咁味道，巨無霸中移動 (941)陷入低增長、甚至盈利倒退的境地中，相反對手聯通(762)就受追捧。聯通近幾個月來3G上客量高過中移動，聯通5月份上客量超過100萬，比市場預期到此目標的日子更早，佢又正洽談在中國引入i-Phone4和iPad，更加好炒。不過聯通現價已經唔平，據湯森路透的綜合證券界盈利估計，聯通現價相當於本年度市盈率38倍，2011年度市盈率27 倍。

競爭加大移動難捱

表面睇聯通太貴，佢要有優於市場預期的盈利增長，才可以令高價逐步合理化，聯通貴，唔代表中移動抵買，而家證券界估佢未來盈利還有少少增長，萬一佢盈利開始倒退，仲有得跌，小心中移動這一隻過去曾是高增長的好股，慢慢會跌入一個低增長的劣勢中。中央政策要拉低電訊業收費，所以引入愈來愈多的競爭，呢個大方向，對本來是電訊業老大哥的中移動相當不利。

國策絕對可左右中資股。發改委要求穩定煤價，下令煤企履行今年合同價。美銀美林預期國有煤企將帶頭穩定煤炭市場，意味着價格上漲受限制，佢將兗煤(117 1)評級降至「中性」，目標價下調至17元，同時將神華(1088)及中煤(1898)目標價分別降至45元及16.5元，評級維持「買入」。市場早前憧憬煤價上升的希望，頓時落空，煤炭股全線捱沽。兗煤勁插逾7%；中煤亦挫逾6%，神華跌近3%，煤股今年都好難炒也。