股路縱橫：PE只6倍多浪潮可見1元

港股連升9日，只係回一日，噚日反覆上落中都係要升市收場，可見市底真係好強，恒指下一個目標係21500至21700點。

中國科技（985）新股本周五「出籠」，話到明「出籠」前後股價會大幅波動，若然急跌，真係入貨好時機。果然噚日就有人偷步狂沽，出現插水式下跌場面，估唔到竟然可以咁接近配股價買到貨，同大戶一樣「待遇」，大劉「入飛」2億美元亦只獲配4成。中科轉型前景雖樂觀，但市況難測，雖然買得平，但為穩陣計，唔對路亦要走頭。

浪潮國際（596）短短半年內由1.40元跌到0.60元，跌達57%，着實過份，本月初開始由低位回升，在0.67元至 0.75元間整固完成，昨日升勢再起，高收0.77元，升4仙，成交更大增6.6倍至4300多萬股，股價亦已重上3條平均線之上，10日線好快會升越 50日線，出現「黃金交叉」訊號，確認歷時半年的中期調整已完成，昨日破位而上，短期目標指向1元水平。

浪潮係內地綜合資訊科技（IT）服務供應商，在行業中穩佔龍頭地位。09年（12月年結），營業額21.55億元，升17%，毛利4.98億元，減3%，毛利率23%，減5個百分點；股東應佔溢利2.54億元，減18%，每股盈利7.37仙，減28%，派末期息1仙，減50%。盈利倒退，主要是毛利率下降，及08年收購的軟件外包業務須為商譽及無形資產撥備約7933萬元，若不計此數，去年盈利仍有增長。

母公司料續注資

浪潮繼續透過一系列的戰略性收購，確立以提供全面解決方案為核心的綜合IT服務的商業和運營模式，並進一步整合IT服務業務及原有IT業務，發揮協同效應，在IT服務業務各個範疇包括ERP、稅務、電訊和電子政務等會繼續取得理想發展，特別在稅務行業更會保持領先優勢。母公司浪潮集團一直培育浪潮壯大，日後仍會不斷進行注資，值得憧憬。

2010 年由於再無撥備入賬，估計浪潮盈利可升到4.5億元，每股盈利12仙，預測PE只6.4倍，以短期目標價1元計，PE亦只8.3倍，股價上升空間仍大。
郭兆誠