青心直說：總統連任魔咒測市底

中國救世界，單靠人民幣升值一招足以令環球股市重振雄風，只係藥效可維持幾耐唔易掌握。有行家話，官方唔希望媒體太高調處理人民幣議題，擔心炒風一發不可收拾。

早前美國財長蓋特納訪京前，扮老友推遲唔將中國定為滙率操縱國，之後突然變臉，聯同聯儲局主席伯南克發表強硬言論，指中國低估滙率令全球經濟失衡，議員更指人民幣最少被低估40%。

中方今次高調還擊，暫時應可紓緩美方壓力，而11月美國中期選舉前，美國政客絕對有誘因砌低美元滙價，藉以刺激出口，粉飾太平。一直唱淡美債的格羅斯亦轉軚睇好，開始趁歐債危機期間增持美債。如果佢冇睇錯市，即美滙指數有機會已於6月見頂並進一步走弱，將繼續利好港股。

任期首兩年跌市多

唔少人忽略咗滙市對股市嘅指標作用，太集中睇眼前股價表現，死硬派一直隨升市追沽，特別係當指數逼近21000時更十分進取，單係周一便有1.2億錢坐熊證。短炒走位要快，當心市況速回後再被挾上去。今年世事反常，美國都可以賽和英格蘭，當人人認為美國中期選舉前股市會被砌低，就應該保持反向思維嘅警覺性，或會有意外驚喜。

大家有冇留意，通常美國新任總統首兩年任期，經濟都會經歷調整期，股市跌至谷底。其後政府施政到位，為連任鋪路都會推出刺激經濟措施以顯政績。政策效果一般在任期最後兩年浮現，股市及經濟隨之轉好。

若果連任又點？歷史上包括列根、克林頓同小布殊喺連任後嗰屆，都好大喜功冇畀經濟休養生息。結果列根第二屆任期內嘅第3年，發生87股災；克林頓命運一樣，2000年科網泡沫爆破，亦係佢任期最後一年；而小布殊則喺佢在任最後一年，為金融海嘯埋下炸彈。

聽落事有湊巧，但政治冇嘢係唔可能，總統為咗連任有乜做唔出！奧巴馬09年上任後，股市去年3月見底，按總統周期理論，股市嘅底應喺2010年前出現，到底去年3月嗰個係底，定係有機會出現雙底衰退？明天再談。

胡孟青