陸羽仁 - 假假哋

香港股民上個星期真係爽，過去港股跟外圍，美股跌，港股都要跟住插，但呢一排港股好似有免疫力一樣，人升佢照升，人跌佢又唔跌，真係強到無人有。

港股上個星期主要上升理由係人民幣升值，但睇番內地股市，又唔見升咁多；睇番比較美股杜指、港股恒指和內地上證綜指的半年圖，就好清楚咁睇到香港近排的特異走勢(見附圖)，過去半年，長期都係美股表現好啲，內地股市表現最差，走勢上落後美股超過10%，而港股就走在中間，阿陀行路中中哋，衰又唔算太衰，好又唔好得去邊。

中環茶友解讀，在早前歐洲危機爆大之前，美股連創新高，港股都跟唔上，主要受內地股市拖住，內地經濟受政府政策影響很大，所以阿爺一話收緊銀行信貸，又話打擊樓市，外資怕內地企業受好大影響，所以避之則吉，資金不再流入內地，香港的H股甚至股市整體氣氛都受影響。內地股市同樣炒跌，每況愈下，影響港股的投資氣氛。

港股走勢追上美股

呢一切都無大變，內地雖然微調人民幣的波動範圍，等如容許人民幣小幅升值，只要唔係容易人民幣大幅升值，按理不應對香港有好大刺激，但港股卻神奇地硬淨。你不要只看指數絕對數值，因為港股在上周一炒上 20900點樓上後，到周五回到20600點左近，在高位已有回吐；你要看相對變化，特別係港股相對美股的變化，美股上星期跌咗咁多，但港股急升完只回了少少，抗跌力超強，令港股相對美股的走勢快速拉近，以半年計，港股走勢已追上美股，兩者出現一個奇異的接合，在內地股市走勢一樣咁弱的前提下，港股表現認真神奇。

正如我早前所講，港股近呢一兩個星期咁堅挺的走勢，好可能和農行(1288)就快上市有關，農行在中港兩地集資隨時有2000億，咁大隻股IPO上市，市場無番咁上下氣氛，去貨唔會去得順，定價唔會定得高，所以如何造好氣氛，係農行能夠順利上市的前提。而阿爺又的確高招，在歐洲危機令歐羅大跌，人民幣升值壓力大減時，突然來一招擴大人民幣波幅，令市場對人民幣預期急增，港股順勢抽高。

近日股市一插，就有「大朋友」出來維持秩序，例如上周三和上周五遇上美股大跌，港股開市唔止唔跌，仲要抽到有得升的水位，等如設定了當日的基調，要大家知道當日係升市而唔係大跌市，早上抽完之後，中段會放番低少少，到3點後又再抽，成為一個小圓盤咁款，個市收番高散場，美股跌港股係咁頂住唔畀佢跌。正如中環茶友所講，美股杜指跌150點，港股跟跌幅都要跌300點，加上港股波幅大於美股，所以正常跌400點樓上一啲都唔出奇，但要強到美股跌港股唔係點跌，仲要兩日都係咁，就真係異數。

農行招股托住大市

如果我呢個假設成立，因為農行要上市，所以要托住港股，唔畀佢大跌，咁要托到幾時呢？我估睇吓農行個招股時間表。在整個招股過程，最關鍵是招股期和最後定價，因為以H股入大飛在配套部份認購的機構投資者，都會押到最後一兩日才入飛，因為佢哋唔止要表示認購數量，還要就可以接受的定價表態，農行招股價範圍由2.88元至3.48元，2010年預測市帳率(即市價兌每股帳面資產淨值比率，愈低愈好)由1.5倍至1.8倍，價差唔細，機構投資者都會睇清市道才決定最後入飛策略。所以若有「大朋友」頂住大市支持農行上市，佢哋都好可能頂到7月6日農行截飛和定價的日子。若過程中外圍有大跌，港股未必唔跌，但跌完都幾易炒番上去。

港股近呢個星期走勢較美股強，真係有啲「假假哋」，唔好信到十足，以為真係咁強。你可能會問，咁農行定埋價上埋市之後，港股會唔會大插呢？

回復正常走勢偏軟

我話農行上市後，港股大唔大插好難講，但好可能「正常番」，即係同美股的差價拉番遠啲。美股近期唔係幾靚仔，杜指跌到反彈上升軌邊，上周五收10143點，要守穩呢啲位置好啲，否則可能穿上升軌掉頭向下。月頭過後，如果美股大插，小心港股插多兩錢，補番之前無跌的跌幅。但如果美股反彈，咁港股又未必會插，只會呆，假如本來港股有700、800點應跌無跌，但美股又彈番300點，咁港股只要人升佢唔升，又可以拉番大和美股的差距，這就是港股唔一定跌的原因。最後好多朋友問農行認唔認得過，目前估計認購熱度中等，農行只會按中位約3元多少少定價，就真係要睇你買來做乜。不要對農行期望太高，論銀行本身的質素，農行不如工行(1398)和建行 (939)，但佢會做靚盤數上市，今年會有較高的盈利增長，佢係國有銀行，今年要做到20%盈利增長無乜難度，所以單以PE(市盈率)和PB(市帳率) 計，農行上市價會低過工行和建行。若是長線投資者，啲錢本來放在銀行收取接近零息，認購農行，等市場轉好啲，等農行公佈業績時，有10%多少少回報唔係好奇。但若你抱投機概念，以為農行可以大炒特炒，咁就唔係太似啦，所以要小心太搏命市況逆轉時要損手。