陸羽仁 - 男人野心別太大

網友大笨袋鼠提到佢和太太理財取向的分別，這似乎是幾普遍的現象。大笨袋鼠話：「袋鼠嫂(靚靚)對投資、投機無乜大興趣(正常佢唔睇陸羽仁)，港鐵 (066)有息派就好開心。結婚時大笨有少少賭博傾向(始終單身過一段長時間，慣自己食自己，無乜掛賴)，所以有日靚靚佢攞份《頭條》，叫我睇陸羽仁，當時大字標題好似係「賭窩輪輸死你」；所以我同靚靚講，大笨嗰份就攞去搏命(雖然相對都已經叫有不少投資成分及控制風險)，佢嗰份就只係穩穩陣陣只買收息股、定期存款；touchwood一句，大笨PK咗都仲有靚靚一份生活。投機貓貓你應該好清楚，李維摩(大投機家)佢初期炒股輸上身，跟住問佢老闆借五舊水，去bucketshops翻身(亦係佢領悟出止蝕道理之處)；其實佢後期幾次投機失敗，就係靠佢老婆個首飾盒翻身。」

男人好賭女性保守

我有一個觀察，就係男人通常會認自己買股叻，其實只係鍾意博、想一朝發達而已，有人投資、有人炒股炒輪、有人賭錢，但比較少人在銀行存定期。但相對地很多女人係唔投資或只作被動投資之人，佢哋自認唔識買股。(我只係講較多數，唔使話畀我聽有啲女人都好爛賭，或者有啲男人都好保守)我有一個觀察：男人太過 aggressive(大野心)。或者呢個係典型「肉食男」的表現，雖然?家愈來愈多「草食男」。

男人呢種愛好食肉、具野心的特性，相信係父系社會教化出來，社會界定咗男人要進取啲，要做一家之主，要賺錢養家，要乜要物。呢種心態投影在投資上面，就係男人自覺好識嘢，女人唔識嘢，男人識投資，女人唔識買股。

我以前講過一個例子，都有超過十年前，有一個我在餐廳食飯，旁邊一枱一男一女，應該是男女朋友也在吃飯，個女仔買咗滙控 (005)，問個男仔，唔收現金利息，收以股代息好唔好，我記得滙控當時應該是50、60元左右，個男仔講一輪，就係話以股代息個定價點唔公平，通常會定高一兩毫子(我都唔知佢呢個理論啱唔啱)，所以以股代息制唔過，個男仔講講吓就話滙控都買唔過，股價上落太少，他買一隻股仔，幾日都升幾成，買滙控無厘味道咁話。

食肉隨時一鋪清袋

唔知係唔係聽到呢個男仔講嘢太認叻，總覺得佢油頭粉面，並不可信，而個女仔青純可人，開始有少少為佢的前途而擔心。十多年過去，?家無法知道呢對男女買股的下文，但女仔即使長揸滙控至今，即使滙控表現如此不濟，但股價仲有賺，加埋收咗咁多年息，回報都有一倍以上。但個男人如果炒炒吓，炒到今日，到底是賺咗10倍，還是上上落落得個桔，甚至個桔都唔見埋呢？

聽大笨袋鼠平時講嘢，佢都係穩陣之人，買股應有合理回報，應該會好過女人買地鐵揸住唔郁。但有更多炒上炒落的男人，過咗10年、8年之後，回頭一望，會唔會發現自己的累積回報(或負回報)，差過自己唔識投資的老婆呢？過分大野心，可以一鋪清袋。食草係唔係一定差過食肉呢？