陸羽仁 - 大朋友買大股

昨日港股真係神奇股市，美股杜指、日股、內地股市齊跌，但港股就硬淨到唔止唔跌，仲要升37點收場。港股走勢好似一個大圓盤咁，慢慢炒番上來，最終反敗為勝，收市倒升37點，收報20857點，但大市成交較昨日縮水近三分之一，只有565 億元。

淡友要小心

港股點解唔止唔跌仲要升，表面睇睇唔出有乜特別理由。有人話人仔升值會唔會吸引咗外資流入香港買股呢？如果係咁，外資應該主要買H股，但國企指數昨日仲要跌0.3%，落後於大市表現。

中環茶友話，農行(1288)臨近上市，眾多外資大行落疊做包銷，阿爺想嫁女收到高啲禮金，啲媒人婆唯有出吓力啦。你睇昨日專揀啲超級巨股嚟升，滙控 (005) 及中移動(941)下晝發力，齊齊倒升近1%，係恒指收高的主要動力。滙控在最後一小時抽升1.6%至全日最高位收市，倒升近1%至76.4元。

茶友話，美股跌港股唔跌，肯定有大朋友專揀大股來買，托住指數，唔係睇個股的真正基本因素，期指尾市突然抽高，當時外圍歐洲股市仲跌緊，真係抽得無厘頭。見到呢種市況，淡友真係要小心，見到外圍跌都唔好咁高興，港股不但跟唔足，仲隨時唔跟，大朋友出死力夾硬頂。陸羽仁早前都講過，農行呢種巨股要上市，埋門一腳時，絕對會左右香港大局。

中國在開G20大會前接連出招，早前人民幣匯改一石二鳥，既提振股市，又封住美國把口，昨日又出第二招，財政部宣佈自下月15日起將取消部份鋼材、有色金屬加工材料等商品的出口退稅。

家電又出補貼

中國出口退稅係補貼出口企業的措施，但無助高耗能產業升級，又面對外國話中國補貼出口的指責，所以開G20之前就順手取消埋。中環茶友話，外界擔心人民幣升值中國出口唔掂，中國唔止無增加對出口企業的退稅，如今仲取消埋鋼鐵和有色金屬業的退稅，可見中國對出口甚有信心，唔信減少津貼，從宏觀來講，呢個這是好消息，唔係壞消息。但鋼鐵業就中招啦，早前不少鋼鐵公司已經話第三季必然虧損，今次再取消退稅，會令鋼鐵業洗牌。鋼股受壓，如馬鋼(323)昨日就跌 1.6% 。

若取消部份行業出口退稅不利相關企業，另一個補貼買家電就對企業有利，中國宣佈《家電以舊換新實施辦法》，國民買新家電按銷售價格的10%給予補貼。繼去年家電下鄉後，今年再出家電補貼，但金額無去年補咁多，相信對相關企業的刺激無去年咁大。

中國經濟前景仍然睇好，交銀國際預計中央政府下半年的政策緊縮力度將減弱，尤其顧慮到國際環境及房產調控的影響，下半年加息的可能性減小。大市連續調整近 7個月，許多行業或股份已呈現投資價值，投資者可以趁低吸納潛力股，可遵循內地經濟逐漸從投資轉移至消費主導的路線來選擇，如電訊設備及電訊增值服務、互聯網、商業零售、食品飲料、家電、汽車；其次是選擇跌到位的安全品種，如銀行、石化；第三可以選擇避險品種：如黃金。

企業CEO陸羽仁‧逢周一至五見報