青心直說：全球最賺錢「交易所」

英德大戰，戰情由球場鬥至賭波網，投資額非常誇張，單是英國著名Betfair網站的總投注額便超過2.26億港元。球迷為家仇國恨又好，為贏錢開心亦好，都全情投入賽事。

身在香港，想玩兩手增加刺激感，唯一合法途徑係幫襯馬會。雖然近年馬會已增加多種投注方式吸引本地客，但與海外博彩公司比較，仍大有改善空間。眾所周知，英國的網上博彩工業可以話係全球最先進，是一個甚麼都可以賭的地方，會否加時踢12碼、朗尼能否以頭槌建功、邊個最後入球、甚至估邊隊「唔贏」（唔贏不等於輸，可以和波），各取所需。

為擴展版圖，英國各大投注網站，都紛紛增加中文服務，吸引廣大愛賭的華人。「八卦」一下網站內容，發現網站非常歡迎香港人，部份更提供24小時免費電話專線，解答客戶問題；夠膽公然在港收受外圍波，海關既然話到明今屆唔手軟，莫非係網站「膽生毛」？

博彩網運作師法交易所

繼續深入虎穴調查，依照網上的香港區熱線，很快便有人接聽，第一句唔係打招呼報上機構名稱，而係問戶口號碼。經過向服務員一番查詢過後，佢哋話歡迎香港人開戶投注，但公司規定落盤地方就唔可以喺香港，公司唔會負責個別地方的法律問題。言下之意，犯法係閣下嘅事，錢就佢哋袋落袋。翻查公司投注條款，果真係寫明歡迎香港開戶入錢，但落盤就唔該在境外。諗深一層，公司的目標根本唔係香港人，而係內地資金。

英國博彩網的成功地方，唔單止玩法多樣化，其賠率亦有優勢。成功例子有Betfair，佢喺99年創立，創辦人想出博彩其實與股市有共同元素，兩者皆由供求關係主導，分別在於博彩有賠率，而股票市場沒有。所以當時想出以betting exchange的交易所概念，以精密的計算程式，將看好看淡的資金作配對，那麼所收回來的彩池肯定夠賠。公司理論上面對較細風險，可從中收取交易佣金，因此亦孕育出如此多樣化的博彩產品。

分享以上故事，並非想鼓勵賭風，只是想借海外成功例子，說明一盤生意要突圍，創意比任何事情都重要，度到絕世好橋才飛身撲入，勝過摸石過河，邊搞邊蝕。

胡孟青