陸羽仁 - 農行退潮 冬江水冷

港股昨日期指結算日，但恒指走勢就唔多靚仔啦，受內地A股勁挫拖累，港股一蹶不振，全日反覆急插，跌到阿媽都唔認得。

恒指上午已經唔見200幾點，到下午開市，沽盤潮水般湧現，成交急增，恒指最多勁挫536點，臨近收市係咁意彈番少少，收報20249點，大跌478點；本月期指收20427點，但過咗結算要睇下月期指，7月期指昨收20187點，大跌555點，低水61 點，係近期首次轉炒低水，大市全日成交590億元，較昨日多30%。

表面睇港股跌市主要由A股帶動。上證綜指昨日大跌108點，跌幅達到4.3%，跌穿2500點重要關口，收報2427點，係14個月以來嘅新低。內地股市大跌後，歐洲股市早段亦受影響，跌2%，而日圓、美元亦升，風險貨幣回吐，昨日黃昏澳元兌美元跌1.6%，歐羅兌美元跌0.8%，全球金融市場捕風捉影齊齊郁。

內地維穩力量退場

內地和港股下跌，可能和農行招股退潮有關，正如我早前所講，近排香港的升市有的「假假哋」，遲早要見真章，只要農行上市的支持力一退，小心大市回潮。

中環茶友話，農行內地招股配售已鎖定晒機構投資者，內地好多大基金就係官方，或者有官方背景，佢地定咗就唔會走；而香港機構投資者亦初步認咗頭，農行上市的大方向應該保咗底，除非外圍爆股災，否則唔會死，鎖定認購農行大戶之後，支持大市的力度就會減細。

內地分析員亦有類近睇法，西南證券高級分析師閆莉認為，昨天可以說是一個敏感時間點，就是農業銀行公佈上市詢價區間(2.52至2.68元人民幣)，這個詢價區間定得合理，對後期發行上市不會形成太大的壓力。

早前內地期股指一直處於橫行階段，主要是金融保險類股份有人在護盤，在為農行上市而製造維穩局面，但實際上市場應該是向下走的。那麼詢價區間一經公佈，金融保險業就唔使再造勢，市場便回復繼續其原有運行方向。昨日午後的大跌並創出新低是對前期橫盤的突破，可以說市場選擇了向下運行，從回落時間和空間來說都仲未係好到位，因此後期還會繼續下探。

基金斬倉力保業績

中環茶友話，論短期走勢內地股市和港股都想向下，特別內地股市破了大位，農行集資又抽緊銀根，不利大市，想撈A股都唔使咁急，可以先忍一忍手。港股未來要回落到拉開和美股的差幅，還有向下空間，先要睇美股如何，但亦唔使急於搶住入市。

而家美國市場開始調低企業第3季的盈利預測，中國市場又講5月份全社會用電量增長20.8%，是年初以來的最低點，預示經濟增長放慢。小心「放慢」係7月向下炒作的主題。

昨日內地股以汽車股和家電股表現最弱，車股東風(489)跌6.5%、吉利(175)跌6%；另外家電股海爾電器(1169)跌10.6%，創維 (751)在業績公佈前再挫9%；TCL多媒體(1070)挫9%；睇呢種跌法，估計不少基金見大市回，搶在半年結前走人，要錢唔要貨，唔想今日半年結前最後一日俾持股再跌影響業績。

企業CEO陸羽仁‧逢周一至五見報hightea@hkheadline.com