青心直說：股票的完美「黃金比例」

早前大婆台電視劇《飛女正傳》裏面，陳豪飾演嘅整容醫生，是一位極端完美主義者，執着於追求眼中符合「黃金比例」嘅完美女人。根據日本化妝品牌資生堂提倡嘅「黃金比例」，核心追求並非單純非黑即白的美與醜，而係由面部闊度、面頰、嘴唇、眼眉及眼睛5大部位相互比例配合塑造出來的分數。比例嘅提倡人是被視為面部黃金比例達人嘅化妝師西島悅（Etsu Nishijima），在大師眼中，兩位靚女木村佳乃與章子怡都係唔夠完美，前者缺陷是面太長，後者則面太短。

套用於股票市場，集齊良好估值與盈利指標於一身嘅股份亦唔等於一定會爆升。美人也會遲暮，股價表現更好講「Timing」，上周五提及嘅承達國際（2288），潛水咁耐，真係動彈不得，只怪股民懶惰唔肯自己做功課，市場上其實大把呢類滄海遺珠，有時見行家捉到鹿唔識脫角真係好嘥，寫多幾隻字話俾人知點解睇得咁好或者咁淡，起碼都有多啲理據支持，唔使搞到班投資者終日炒來炒去都只係識炒個價上上落落，知其然而不知其所以然。

5大揀股要求

講到呢度，究竟股票嘅「黃金比例」又係乜？個人睇法是從另類5官出發，負債率唔過25%、毛利率超過10%、派息比率超過30%、息率高過3厘、未來一年盈利增長大於 10%。完美股票難求，能夠符合以上要求者已經好堅，當然你可以加上更多自己嘅要求，例如市場地位最好在三甲，甚至經營現金流入增長要大於營業收入增幅，閣下甚至可以列出更嚴格嘅7出之條，例如零負債等等。每個人都有自己一把尺，各師各法之間都係講求透過市場經驗自行優化。明天再搵多一個與承達國際有異曲同工嘅例子，去證明呢個黃金比例能否經得起考驗與驗證。

胡孟青

獨立股評人