陸羽仁 - 四公主出嫁唔包生仔

港股前日病貓變老虎，農行(1288)招股截飛定埋價，又好似老虎變番病貓。但恒指開市已經失守二萬點關口，收市報19857點，跌227點或 1.1%，幾乎完全抹去了上日的升幅，成交只有425億元。

農行一截止認購，港股的表現就弱過外圍，似乎要交番啲功課出來。中環茶友話，最唔好就係期指前一排仲一直頂住炒高水，但前日開始炒低水，昨日都有明顯低水，今個月低水71點，下個月仲低水112點，睇嚟都有人不斷沽吓期指。而「七行」昨日亦全線向下，無咗「大朋友」支持真係差啲。

集資額超英趕美

農行招股如果包銷商行使埋15%超額配售權，估計中港兩地供集資221億美元(1 720億港元)，勢將成為全球最大的IPO，剛好超越工行(1398)的1710億元集資額。

阿爺都算巴閉啦，在呢種市道，仲可以成功推近2000億的IPO，美國今年最大那隻IPO係一間加拿大公司SmartTechnologies，呢個星期上市，只不過係集資6億美元(4 6.8億港元)，真係蚊髀同牛髀。

農業銀行係毛主席當年創立，毛主席當年話要「超英趕美」，估唔到而家在人地最強的金融領域，竟然在集資上俾我地祖國實現咗超英趕美，只能歎句「十年河東、十年河西」。老美暫時忍你一忍，希望養完傷東山再起。

農行發行價最終敲定，A股的最終發行價2.68元人民幣，與網上申購價一致。H股則為3.2港元，略高於招股詢價區間的中值。香港上市價3.2港元，折合人民幣2.

78元左右，略高於內地的2.68元定價約4%。香港公開招股經初步點算，超額認購近8倍，獲超過10萬名散戶入飛，市場凍結資金近 400億元。散戶認購農行的反應相對工行大為遜色，與其餘已上市的7家內地銀行比較，係倒數第一。

當年招股反應排最後係建行(939)，但凍結嘅資金亦達到1380億元，今次農行招股反應無咁熱烈，原因可能係?家市況麻麻，定價又唔係咁筍，散戶梗係唔敢咁博啦。內地就熱烈好多，初步話凍結咗 3000億人民幣資金。

內地認購熱，香港認購冷，按理定價應該係內地高啲，實際卻香港定得高啲，我估官方解釋係香港機構投資者認購熱烈，實情係有啲政治成份，點都內地價平啲，益吓內地股民。

以農行香港H股3.2元定價計算，即相等於2010年預測市帳率約1.7倍，以中行 (3988)昨天收市價3.99元計，市帳率約1.54倍，換言之，農行定價較中行貴約10%，仍較建行折讓一至兩成。據了解，周一農行承銷商發出「定價指導範圍」後，有部份機構投資者可能覺得定價過高，放棄申購。國際配售部份最終仍錄得約6倍超額認購，當中未計及約425億港元的基礎投資者認購部份。

有讀者問農行上望多少，我話真係要睇大市，若果大市好，內地早香港一日掛牌表現又好的話，咁仲好啲，但係唔好期望太高，如果升10%都好多人會沽；若大市唔就，內地上市又升得唔好的話，要小心有破底之險。中環茶友話，阿爺送四公主出嫁，唔會包生仔，況且農行咁大隻，跌起上來唔易頂。

企業CEO 陸羽仁‧逢周一至五見報