陸羽仁 - 出得來行慢慢還

隔夜美股勁升近3%，杜指大升274點，港股跟隨高開374點，重回20000 點上方，內地A股不濟，恒指升幅逐步收窄，至20000邊緣才見支持，收報20050點，漲193點或1%，大市成交輕微增至455億元。

中環茶友話，港股如果跟到美股升3%，可以升近600點，最後只升193點，以點數計都少過杜指升幅，表面睇係因為內地股市弱，上證綜指昨日跌0.3%，實際上係早前農行(1288)招股期間港股出奇地強，走勢唔止超越內地股市，連美股都過埋頭，但又見唔到香港有乜特別利好因素，用句俗語話「出得嚟行預咗要還」，若要回復「正常」，港股走勢會弱番過美股啲，即係美股升時港股升唔足，美股跌時港股又會跌多啲。

茶友話，美股早前跌幅過大、跌勢過急，早已等緊反彈，由於早前積落淡倉好多，所以一彈起上來，又會夾得好緊要，但後市關鍵要看美國經濟，美國大公司進入第2季業績公佈期，第2季應該唔差，問題要睇佢哋自己預測第3季好唔好，未可以太樂觀，暫時睇只係一個跌後反彈市。

渣打跑贏大象

前日美股大升嘅主要原因係道富銀行(StateStreet)發盈喜，刺激金融股反彈，推高大市。香港情況差不多，招行(3968)昨日亦發盈喜，預計今年上半年純利按年增長逾50%，但對其他巨型內銀行股刺激不大。

新股近排唔多老嚟，國泰君安國際(1788)背景都好強橫，但昨日首日掛牌都要先破破位，收報4.14元，較招股價4.3元跌3.72%，佢開市無耐最高造4.31元，但這已是最高位，走唔切要先吃眼前虧。估計要先行插低收貨，收乾才有表現。

跨國銀行股受美國刺激，大笨象滙控(005)上升2.5%，渣打(2888)更彈4.5%，睇圖見到渣打走勢強過滙控，渣打明顯形成上升軌，滙控還在下降軌中掙扎想脫身。講基本因素，美國經濟又有下滑跡象，滙控美國嘢唔少，又要捱。所以睇5年就唔知，睇一年半載，渣打好大機會跑贏滙控。

外資行睇好A股

不過外資行繼續做好友，大摩及瑞信對後市，尤其係A股都睇得好樂觀。大摩的婁剛更認為A股係十年難遇嘅入市最佳時機。因為A股預測市盈率約10倍，係前所未有咁低也。

瑞信則預期上證綜指年底會去到3000點。主要係：一、銀行大抽水基本上已完結，負面因素已消化，資金回流股市；二、中央開始關注地方政府負債問題，已下令其停止發債，地方政府負債透明度亦得以提高。這行動除去了市場前時擔心地方政府孭咗好多債，或會對經濟造成好大衝擊。

我估A股短期調整未完，2300點應有些支持，但入得去買，真係要長線投資者至好，因為買完可能再跌，睇短線買完即跌會媽媽聲。

企業CEO陸羽仁‧逢周一至五見報