陸羽仁 - 雙鬼拍門

港股受美國查高盛和內地打擊房地產影響，昨日大跌460點，收21405點，跌幅2.1%，期指尾市略彈，收21479點，跌409點，成交776 億。

你話港股跌得多，其實又唔係多，因為美股杜指跌125點在前，內地亦因阿爺打壓房地產而大跌，上證綜指跌咗150點，跌幅高達 4.8%，股指期貨掛鈎的滬深300 指數跌5.4%，5月股指期貨合約更大插6.8%，香港跌2.1%叫做濕濕碎啦。

美國證監會上周起訴高盛及其副總裁FabriceTourre，在相關金融產品交易中涉嫌欺詐，導致投資者損失逾10億美元。雖然高盛仍然死撐話證監的指控在法理上根本不成立，且與事實不符，將爭論到底。但上周五股價暴挫13%，創下了自去年1月以來單日最大跌幅。滙控(005)及渣打(2888)昨日齊挫逾3%。

美國監管機構郁華爾街大行，令人擔心大戶會做嘢，砌低個市施壓。不過今次民事訴訟性質只係好平和，根本無涉刑責，事後證監會都要解畫，放風話只係採取民事追究而唔係刑事，係因為成功機會高啲，咁即係話政府都未出辣招，似做政治騷多啲，所以講話對大市影響，照計都係內地加強調控樓市仲入肉。

內地樓價有得跌

內地股市大插主要受打擊樓市的「新國十條」影響，第一波將國民買第二套房的首期由4成調升到5成，第二波叫銀行不要借錢俾人買第三套房，又唔畀外地人買，同場加映叫銀行嚴控各類地產貸款，搞到周末內地樓市放盤人激增，北京放盤人多了近30%，炒家想馬上減倉離場，但買樓客卻少了一半，買賣的強弱姿態互易。

內地股市好敏感，見阿爺打樓市打到咁應，即時要錢唔要貨，連股票都掟埋，咁啱有咗股指期貨，就唔客氣啦，實行沽期貨先。股指期貨變成放大器，升時放大一啲，跌時亦放大一啲。

可能你會問，內地打擊樓市，點解唔止地產股，其他股份都係咁跌？熟悉內地情況的中環茶友話，阿爺今次動真格打擊樓市，出招集中打樓市的資金鏈條，鏈條斷裂後，對樓市有實質影響，呢次好似會打到樓市跌為止，可能真係要跌番2、3成先至交到差。內地好多企業有錢在手，都用這樣或那樣的方式介入樓市，炒埋炒埋唔少樓，如今一話樓價跌，好多同買樓無關的企業都可能損手。

茶友話，港股呢次遇上雙鬼拍門，雖然唔算跌得好情緒性，但美股未必咁快跌完，內地嚴打樓市的壓力仍然相當大，在兩邊外圍都唔利好的情況下，港股有仍向下壓力。

勿急撈內房股

一有跌市不少人想入市，特別見內房股跌咁多更心郁郁，例如中海外(688)跌3.7%收14.92元，但外資行睇法好分歧，有人話可撈，有人叫忍手，好似早前睇好內房股的大摩就話，佢哋早前表示可考慮內房股，因現價較每股資產淨值平均折讓46 %及相當預測市盈率10.8倍，但現在看來中央有打壓樓市的決心，預期中央會再推出短期調控措施，政策風險短期內難以去除，叫投資者宜先行迴避。大摩又話，銀行將隨中央指示引緊房貸，利淡有國企背景的發展商如中海和華潤置地(1109)，借錢較多的復地(2337)也受影響，另外富力(2777)亦跌 8%，幅度比較明顯。

我睇法都類似，中央會接連出招，樓市剛開始回落，內房股仲有得插吓，所以就算係股市會走得快過樓市，估計內房股會比大陸樓市先見底，但相信短期氣氛仲係唔明朗，安全計都係等佢跌深啲先入都未遲。