陸羽仁 - 四公主出嫁有行頭

中國增加人民幣匯率彈性，刺激全球股市上日大升，刺激過後，昨日齊齊回軟。恒指連升九日之後，都係時候唞吓氣，恒指開市低開51點，中午曾一度跟隨國內股市回升，倒升45點。午後上證綜指上到2600點，見頂回落，恒指亦跟住回軟，但仍然企穩250天移動平均線上方。恒指收報20819點，跌93 點，大市成交回落到611 億元。

農行已經去到貨

今次阿爺放寬人民幣交易區間，變相讓人民幣升值，明顯和農行上市轉入直路有關，農行上市時間表初步大致係咁，佢將於明舉行上市推介路演，周五確定A、H股發行價區間，香港招股日期為6月30日(下周三)開始，7月 6日截止兼定價，7月16 日在香港掛牌。

中環茶友話，阿爺有四間國有銀行，工行(1398)、建行(939)、中行(3988)和農行，呢四個女要放出來上市，好似嫁女咁，唔係咁容易，農行本來又大隻又唔係咁標青，所以前面三個女嫁晒都未輪到佢，要搞多幾年化靚個妝才出來見人。農行上市要在中港兩地集資大拿拿2000億，中港兩地股市近期唔係咁活躍，要做大集資唔係咁易，所以阿爺才要咁大動作，搞到讓人仔升值，等如送一大筆嫁妝俾呢個四公主，希望佢嫁到頭好人家。

茶友話，阿爺出埋人仔升值呢一招，用內地術語去講，農行上市再無懸念。茶友話佢都可以度埋農行推介的主題，?家歐羅唔掂，美國經濟唔好美元虛升，亦唔係咁靚仔，所以本來都應該投資人民幣資產，?家再加送一個升值預期，買人民幣資產更加無衰。咁仲唔夠，茶友又話，睇番農行的盈利，09年純利為650億元人民幣，按年增長26%，佢自己預測今年純利可達840億元，相當於增長29%，買落去無理由輸喎！

茶友話，好多大基金基本上已計掂數可以入飛認農行，?家即使未塵埃落定，都定得七七八八，人仔升值更將大市氣氛搞得好啲，只係等大家落飛落得爽手啲而已。

跟炒航空股即中招

聽完茶友咁講，即係話照目前市況，農行都應該可以去到貨，所以大家唔好有太高期望，以為要炒到22000點、23000點等農行上市。當然，若果最後真係下周三開始招股，做好做醜都會有人頂吓。

我估早前內地股市太差，影響到外資買港股的心情，甚至有不少基金沽咗貨等6月底半年結都未買番，但突然殺出一個人仔升值，大家都估未來會多番啲資金流入香港和中國，令持貨較少的芬佬都要補番啲貨，所以周一成交急升。

每逢遇上呢啲大升時，有時追貨唔好追得太狼，唔係都有啲風險，好似啲內地航空股，佢哋買埋唔少飛機，要用人仔交數，所以人仔升值對內地航空股有利，比如國航 (753)昨日早段突然抽升，由前日收市8.49元，早上急抽上9.18元，升咗8% ，但升完好快就回番，收市更微跌至8.44元，散戶朝早見急升去追，覺得人仔升值航空股升得有道理，點知你一接貨佢馬上就回，走唔切即時中招，真係好似有持貨大戶抽高派貨。所以散戶後知後覺，甚至跟股份郁動追入去炒，真係好易「瀨嘢」！

企業CEO陸羽仁‧逢周一至五見報