青心直說：人仔升值明益豪宅

天匯撻定事件中，最令人詫異係涉及一位前DJ，唔通講股講波講馬都好搵唔過播歌打碟？唔知電台仲請唔請DJ呢？不過據知呢位仁兄當年做DJ時已經揸緊林保堅尼返工喇喎！

喺持續長期低息、游資充裕及供應有限嘅推動下，發展商對9招12式長遠對本港樓市影響力有幾大，其實好少理，同枱食飯各自修行，合和實業（054）以高於同區二手市價兩成開售跑馬地樓盤，首批平均呎價近兩萬二；信和置業（083）雙盤齊發，大埔盤粉絲當魚翅賣，每呎開到過8000幾蚊，令即將派價單嘅大角嘴樓盤大條道理高開。

世紀撻定事件對市場情緒氣氛影響短暫。根據萊坊統計，首季全球樓價升幅榜中，亞太區佔晒頭4位，中國按年升68%（俾海南島拉高晒）、香港30.6%、新加坡 24.3%、澳洲20%，其餘第5至10位只升10.7至15.9%。熱錢來源非常集中，頭4個月本地豪宅銷售中，多個知名豪宅盤嘅內地買家比例超過 50%。

香港樓市打不死

投資者足迹遍及澳門。早於3月，由德祥地產（199）等5家發展商聯手發展嘅澳門樓盤未開售已獲一個內地基金，以8億銀掃入其中200伙，創澳門樓市單一最大金額成交。

本地豪宅市場正面臨樽頸，內地又打壓炒樓活動，逼資金外逃，近期唔少買家趁歐元、英鎊下跌，四出掃貨。英國樓市首季只升8.8%，吸引海外資金，包括本地富貴人家去金絲雀碼頭掃豪宅。

截至今年3月，倫敦市中心按年新增單位7595個，當中41%係投資者買入，近半買家來自亞洲區，估計過去一年流入超過7.61億英鎊。投資者比例急升，但同07年高峯超過7成仍差得遠，反映市中心優質盤仲有水位炒上。

代理話內地人買樓有如集郵，到底香港豪宅係貴定平，就似絕版郵票咁冇一個定論。若人民幣升值步伐加快，香港樓價相對變平，加上供應有限，始終係內地資金長線投資嘅首選，呢種現象根本等於「阿媽係女人」，唔使提醒都一早就知──香港樓市打不死。

胡孟青