陸羽仁 - 農行效應有料到

受人行推動人民幣匯率機制改革利好消息帶動，恒指在中資股帶領大市向上，最終恒指收報20912點，升625點，成交金額大增至902億元。

人仔改制，滬深股市都轉勢上揚，金融板塊再度出手護盤，股指隨之回升，強勢上揚，滬綜指以報收2,596點，上漲73點，兩市成交額共計1507億元。

內銀股開始偷步炒

股市借住內地重新採納彈性匯價制度，人民幣匯價升至五年高點，港股再受憧憬匯價升值，大市又有炒上藉口，指數大幅夾高。中環茶友話，農行即將上市，咁啱內地管理層就宣佈匯率可以有多啲彈性，咁樣既可以減低開G20時的壓力，又可以谷高個市，可謂一石二鳥。內銀股應聲彈高，大有偷步炒上之勢，建行(939)、招行(3968)漲5%；交行(3328)走高6%，表現最出色。

中央重啟彈性匯率機制，有好多專家話，咁唔代表人仔會大幅升值，甚至有專家話兌歐羅可能會貶值，好似花旗私人銀行董事總經理包樂俊就比較保守，話中國人民銀行宣佈人民幣不會一次過升值。他預計人民幣兌美元將於今年年底升2%。不過，股民久無炒上的理由，聽到疑似好消息，立即係出亢奮性反應。

茶友話，恒指升埋今日，已經係九連升，早前個市係萬九點死守住，就算壞消息充斥都頂住，跟住陰吓陰吓連升多日，顯示有人暗暗發力托住。不過，指數升咗咁多日，加上單日升幅咁大，短線或者有獲利回吐唔出奇。

樓盤未賣地產股先炒上

各類股份中，除人民幣概念相關股份外，香港地產股係一類升幅好大的股份。

發展商係三、四月份，本來有幾個大盤推出，但因為政府「九招十二式」推出叫停，自從何文田地王以高於市場價賣出，市場覺得大地產商仍然睇好後市，信心再度回升，?家好多市區屋苑，都造出過萬元一呎的紀錄，令到地產股由低位反彈。

在政府干預聲中，樓市是否真係晴空萬里呢？一個可能性係樓市經過早輪溫和調整，跟住再大力炒上，結果觸發政府大力干預，情形如九七年前，樓價不斷升溫，政府逐步加強干預力度，最後使用大增供應的撒手鐧，成個樓市跟住散晒；比較好的情況係樓市分層化，豪宅及市區新盤變成一個市場，買家主要係有錢人同內地富豪；新界樓同二手市場價錢則平一截，買家係本地自用人士，總之一邊你有你炒，一邊我有我住，?家地產商高價競投市區地，肯定係起豪宅賣貴樓，究竟個市係咪咁走，要兩三年先至揭盅，但地產股早前已經跌咗一兩成，超賣下率先反彈。股票同物業最大不同之處，係股票易買易賣，最宜炒住一轉先，所以樓市氣氛一轉，股價即刻夾上咗。

其他類型股份都紛紛造好，濠賭股全線向上，濠賭近排表現強勢，好多股份都係創緊新高，暫時亦未有公司伸手，似乎Party未完，有貨在手者毋須太急於收割，想沽貨都可以分段進行。由於成交配合，如果大市停一停、唞一唞，資金就會炒落後，輪到三四線股仔郁吓。

企業CEO陸羽仁‧逢周一至五見報