陸羽仁 - 本地銀行有商機

近日外圍股市喘定反彈，但香港股市未跟足外圍升幅，主要受內地股市呆滯拖累，拉住恒指後腿。早前港股跌到19000點左右就頂住唔跌，上周五收 20286 點，繼續一個溫和反彈的進程。

內地突調整匯率政策

近期內地股市對香港是一個負累，以上周五計，內地A股繼續插，上證綜指跌咗1.8%，跌到2513點，險守2500點大關。農業銀行上市抽水在即，對市場有好大壓力，若阿爺不發功護盤，2500點話穿就穿。上周五內地小型股跌得最犀利，創業板指數繼上周四大跌5.1%後，上周五再跌6.1%，爆咗個小型股災，內地股市未走出一個下跌不休的格局。

相對而言，歐洲局勢有少少回穩，而美股呢次反彈到如今已超過上一個反彈浪頂，一浪高於一浪，雖然呢一轉升得多有機會調整，但美股走勢開始回穩向番上。

港股就夾在中間，追唔上美股，又唔至於似內地股市咁差，正式係阿陀行路———中中哋。

上周六內地宣佈增加匯率彈性的新政策，成為中港股市新添因素。自從歐洲爆發債務危機，歐羅大跌變相推高人民幣匯價，外界估計內地將貨幣升值的機會仲低，故此部份資金開始撤離中大華區域，上海出現市民兌換美元的潮流，港匯亦強勢不再，在這個基調下，內地管理層忽然在匯率政策上變調，相信係G20開會在即，美國壓力沉重有關。

人民幣重啟彈性匯率機制，有美國分析員估計以目前全球金融狀況，人民幣兌美元未必升值，但一般相信人民幣輕微升值機會存在。無論點都好，中央調整政策，點都改變了外界認定短期人民幣不會升值的預期，成為股民要考慮的因素。

美資行高盛睇好工銀亞洲(349)及中銀香港(2388)，佢在上月底發表一個報告，話內地收緊貸款，令部份需求轉移到香港，有些本港銀行受惠，特別是母公司是內地銀行的香港銀行受惠更多。

內地公司來港借錢

高盛當時睇住金管局公佈的銀行貸款增長數字，睇好本地銀行十分合理。因為3月份貸款增長按年上升9.5%，而按月亦上升2%，香港當時已是連續第三個月出現按月上升勢頭，數據反映香港銀行的貸款市場正全面復甦。銀行界人士話，香港貸款需求仍在上升中，這對銀行業的營運比較有利。

佢話，過去佢哋受幾重打擊，首先係貸款比率偏低，收咗存款都借唔出去，但銀行營運燈油火臘開支唔細，貸款比例少就無乜肉食。其次是外圍低息、銀行水浸，令貸款利息偏低，貸款相對存款的淨息差收窄，即係借到錢出街都賺得唔多，大家諗吓那些和Hibor(本地銀行同業拆息)掛鈎的按揭就知，在拆息低企時，這些按揭只收1厘息，銀行做咗都唔見肉。第三係理財收入減少，過去銀行做好多理財生意，賺取非利息收入，但自從雷曼事件後，金管局收緊銀行經營這些業務的限制，銀行大歎生意難做。

雖然這些大環境因素未完全改善，但最壞的情況已經過去，特別是貸款需求持續增長，令經營環境慢慢有根本改善。銀行界人士話，好似工銀亞洲阿媽工行(139 8)是內地最大銀行，在內地生意網絡龐大，在內地受制於阿爺限制放貸的政策，有啲客戶需求借錢都借唔到俾佢哋，但如果對手係國企，在香港有子公司，過去香港子公司唔使借錢，如今就可以叫這些國企子公司在香港借，借完運番去內地用，這就是高盛所謂母公司係內地大銀行的本地銀行之優勢。

高盛薦工銀亞洲

高盛在5月底出完報告後，到呢個月中再出報告，話本地銀行業前景較今年初好轉，估計工銀亞洲今明兩年估計盈利增長仍然理想。高盛出完報告後，工銀亞洲都升咗唔少，上周五收市20.45元，已好接近高盛的21元目標價，距離佢嘅一年高位21.15元，亦只差3%。工銀亞洲現價只等如10.5倍市盈率，可等略回吐時吸納，然後食住經濟復甦帶動本地銀行業生意回升。另一隻阿媽係內銀股嘅是中銀香港，是外資行睇好的本地銀行股，上周五收17.76元，比一年高位 19.88元，仍有12%差距，不過論市盈率中銀香港現價已經是13.7倍。

中環茶友打趣咁話，外資銀行阿媽窮個仔賤，因為阿媽唔會照顧阿仔，如返內地做阿媽同個仔會爭生意。但以工銀亞洲的情況，卻是阿媽富個仔貴，同阿媽有分工，按道理工行是環球市值最大銀行，亦是中國第一大行，自己咁威，都想個仔威啲，所以等佢個仔股價回吐時買吓，唔止可以食住香港經濟復甦條水，仲可以望吓佢阿媽做多啲嘢湊大啲個仔，都有啲投資價值呀！

hightea@hkheadline.com 企業CEO陸羽仁‧逢周一至五見報