陸羽仁 - 督住柺杖行出街

美國聯儲局在上周四美國收市後突然宣佈加貼現率0.25厘，將呢種銀行向聯儲局借錢的利息加到0.75厘。事出突然，上周五亞洲市時段，美股杜指期貨應聲跌近百點，亞洲市以港股跌得最厲害，恒指跌咗528點，收19894點。不過歐洲股市反應較溫和，而美國市更先跌後彈，最後杜指微升9點收場，收報 10402點。

金融界猛人形容，美國是全球資金之源，之前把利息減到近零救經濟，就等如為重症病人打類固醇，個病人雖然會行會走，但一啲都唔正常。貼現率和聯邦基金利率差距咁少，等如鼓勵所有金融機構在市場借唔到錢時就直接向央行借錢；聯邦基金利率接近零，如果唔能夠加番上去，起碼加番到2 厘以上，就等如央行失去了利息工具，萬一經濟再出現問題時，無咗減息呢個工具去刺激經濟，呢個就係日本的情況，利息長期近零，經濟長期積弱，央行亦無法刺激市場。所以合理的央行行長在極低息維持一段時間後，都會想加番少少利息，令金融體系正常番啲，令自己有番啲子彈在手。

何時加息市場分歧

聯儲局開始加貼現率，市場有啲擔心低息期結束，但摩根士丹利首席投資策略師DavidDarst就唔係咁睇，佢話呢個係「杯水半空抑或半滿」的爭拗，市場擔心美金跌到過籠，擔心美國總統奧巴馬會矯枉過正去向左邊，會沒收一切，但佢認為美國只係用「嬰兒步伐走向中間」。

DavidDarst 對加貼現率感到樂觀，「對我來說，呢個病人?家只係督住支柺杖行出街，只是走出醫院的庭園晒吓太陽而已。」聯儲局主席伯南克正在走鋼線，佢太快加息，會窒礙經濟復甦，呢個病人本來死死吓，你一下子停止注射類固醇，佢可能馬上兩腳一伸就咁玩完，但太慢加息，又要冒高通脹之險，特別係商品通脹會來得好快，伯南克唔減類固醇的劑量，佢又可能過份興奮透支體力玩完，所以如何減藥量，需要高度技術。

聯儲局加貼現率後，市場分析家對佢何時開始加息(即係加聯邦基金利率)，睇番仍然分歧，從美林美銀估要遲至明年才會加息，而紐約國民證券的JordanKimmel 估計快至兩三個月內就會加息，睇法南轅北輒。而利率期貨的價格顯示，有七成交易員估計聯儲局在今年9月會開始加息。

觀乎美股在周五並無下跌，就知道市場的真正看法，聯儲局這麼快加貼現率，固然令人估計佢加息的時機或會提前，但睇番美國目前的經濟形勢，又唔估計佢可以加息加得太快。若然只是用嬰兒步伐退市，而退市又代表咗經濟開始正常啲，咁加貼現率就唔係壞消息。

開始加息美股續升

我哋好關心加貼現率後股市會點發展，先講美股。美國開始加貼現率，點講都好、幾慢都好，都算係一個加息周期的開始，不過從歷史上的數據看，美國開始加息周期，拉長少少睇，股市唔係跌，而係升。

標準普爾的首席投資策略師SamStovall話，聯儲局開始一個加息周期後，美股典型的反應係繼續上升。自1946年起，美國聯儲局曾有13次加息收緊信貸，講你都唔信，股市在加息周期開始後的表現，竟比人們估計的好。

SamStovall 話，佢睇嘅係標普500指數的表現，以6個月而論，標普500平均升4 %，但開始加息後，仍有2.6%升幅。以12個月計，標普500指數平均有8.1%升幅，但加息周期開始後仍有6.2%的升幅。換言之，加息周期開始，美股不是轉升為跌，還繼續上升，只是升幅略為變得溫和。

如果中線計美股續升，對包括香港在內的亞洲市場，都係支撐因素，但要小心觀察美元走勢，留意若美元轉強對全球投資市場的影響。美元指數在上周五曾一度衝上81.342的高位，但後來急回，收報80.643，高開低收，美元短線還有回吐壓力，但拉長少少睇，美元指數連穿大位向上，走勢相當強勁，仲係在一個反覆向上的勢頭當中。美元指數係統計美元兌六種主要貨幣的走勢的指數，當中一半比重係睇美元兌歐羅，美國經濟雖然弱，但卻似乎比歐洲強，若果美國復甦未算強勁，歐洲國家的復甦勢頭就更差。?家美國開始加息周期，歐洲國家加息周期遠未開始，可以想見，美元中短期走勢仍有繼續走強的空間。

美元續強港股落後

你可能跟住問，美元強又如何？你睇番美元指數，佢在去年11月25日見咗低位74.227，之後在12月開始見底回升，自此之後，美股就開始拋離港股，美股創新高，但港股跟唔到美股，創唔到新高，美股升時港股跟唔足，美股跌時港股跟到十足，若睇埋內地股市，比港股更弱一點，走勢同樣差過美股。

我認為係美元轉強，資金回流美國市場，令資金直接從港股和間接從內地股市流走，所以港股走勢才會轉弱。若果呢個假設係啱的話，短線若美元繼續強，港股會繼續跑輸美股，雖然咁樣唔代表港股會不斷跌，只要美股唔大跌，港股都唔會跌得去邊，但暫時唔好期望港股走勢太勁，我估要等美元反覆升到頂位後，或者本地集資活動好活躍，帶動資金流入，港股才會勁啲，這可能是下半年的事。所以觀察美元走勢，都有助我哋分析港股相對美股的走勢。

港股雖然短期或會繼續落後於美股，但中線仍可睇好。外資睇好亞洲高增長市場股市者大不乏人，DavidDarst就係其中之一，Darst估計美國公司今年的業績會非常強勁，佢又估計本周五美國會調整早前已公佈的去年美國第4季GDP數字，會由按年增5.7%，調高到按年增5.9%。

港股上周五大跌，表面上反應有啲過份咗，特別係杜指期貨當時跌近 100點，但到正式交易時都止跌為升，更顯得港股有少少過敏。不過我估過敏的源頭部份亦來自對內地指春節後開市的憂慮，市場怕內地自己加完存款準備金率又遇上美國加貼現率，唔知內地股市頂唔頂得順，所以港股今日表現還要看內地市，若內地市唔太差，港股應有合理反彈。未來若大市再深度調整，長線還可以擇優吸納，但要預備捱一段時間。