陸羽仁 - 投資心態不能歪

新年開始，陸羽仁想同大家講吓投資的態度，投

資要有「正心」，買股才能有收穫。

所謂正心，係心態要正，唔好歪，所謂心態歪，唔係話大家炒炒吓，而係話大家唔知自己做乜，唔知自己係投資定係投機。

網友Ccb在早前的提問係一個好例子，佢上周問我︰「陸老師︰今天重越20000點，咁早前在19400點左右買的貨，是否應在今天鎖定利潤呢？還是等到明天，甚或持貨過年？那些都是可以守的資金，謝謝指教。」

我覺得Ccb的思維有點混亂，點解佢啲策略咁怪？在19400點買了貨，到20000點，假設其持貨的表現與大市同步，有600點的利潤，即3%左右的獲利，本來投機有利潤離場唔出奇，點解佢又話有資金可「守」呢？若跌穿19400點的入貨位，佢又係唔係繼續守呢？

投機要鎖定利潤

佢呢個係一個奇怪策略，在19400點買貨，假設升10%和跌10%的機會均等，升可以升到21340點，跌可以跌到17460點，如果升3%就走，佢會唔會跌的時候卻又走去守呢？如果升的時候唔係見到有明顯危險食少少又走，但跌的時候又話有資金唔怕長期守，睇落好似「贏粒糖，輸間廠」的典型，咁樣買股好難贏噃。

因此，我當時咁答Ccb：「你問在19400點買的貨，應否在而家鎖定利潤，又話有資金可守。我覺你要先搞清楚觀念，在19400點買的貨，你想而家鎖定利潤，我假定你係以『投機的我』心態入市，否則唔會咁快諗住鎖定利潤，若短炒就唔好話有資金可守。

短炒唔需要做人世，唔好諗住守，正確態度應該係︰得就坐吓，唔得就走。我建議若短炒的盤，在低位買咗，最好等好消息出現時，即歐洲救希臘方案面世時，若個市大升就沽一半，鎖定部分利潤，剩餘可以睇吓，得就坐吓，先定止賺位，唔好走埋。不過若果你是『投資的我』，想法就完全不同，可以繼續持有。」

投資可耐心持有

Ccb 後來再回應話︰「謝謝老師解答，我的概念可能錯了，我想做『投資的我』，但卻壓根兒抱着『短炒』的心態呢。我是抱着這種心態投機的，即大跌時買入很難輸大錢的『大股』，然後在等反彈，若果彈不了，就視為『長綫投資』，從動機來說，我還是接近『投資的我』吧，只是以『投資』的角度限制自己『投資的我』的範圍而已。」

「大股」不等於安全

Ccb自己講得好啱，佢其實係炒大股，覺得大股安全啲而已，根本係炒作心態，但無炒作的技巧與紀律。我認為買股票首先要「正心」，心態要正，投資就投資，投機就投機，無謂騙自己，一個人可以同時做「投資的我」和「投機的我」，投機和投資的資金多少，最好一早定咗，唔好變來變去，唔好投機不成變投資。