青心直說：炒世博見好即收

周末外出食晚飯，四處人頭湧湧，市面消費意欲相當唔錯。過年自己??好、幫小朋友??都好，利是錢都係唔好亂花，每年留啲做投資，持之以恒選啱股份，複合增長肯定嚇死你。大市被美國加貼現利率嚇一嚇即時唔見 528點，點知外圍完全冇事，後知後覺就會話係我哋反應過敏。睇上周安碩 A50中國（ 2823）表現，就知人心係幾咁虛怯，上星期 3個交易日， A股仍在休養生息， A50卻大波動，上周五更被質低到比資產值折讓近 3%，擺明車馬沽定先，為市場製造 A股周一表現好差嘅預期。不過內地市場並唔係咁睇，上周末仲傳出股指期貨規則正式獲批，市場認為係一大利好股市訊號，樂觀情緒升溫，從過去多年歷史計出 A股紅盤高收機會率有 70%，雖然呢啲統計唔多科學，但經過廣泛報道後，講講吓就成真，加上外圍繼續升， A股好有機會為全球帶來驚喜。
吸取奧運教訓早散水

早前同大家研究過今年十大內地券商推介嘅金股，虎年又換咗啲心水。冇變嘅係平保、中信證券、招行、西山煤電、保利地產同鞍鋼，另外有 4隻新血包括中國南車、太保、新世界同百聯。即係券商繼續推介保險、股指期貨、高增長內銀股，同復蘇概念嘅鋼鐵及地產股板塊。而新入圍嘅百聯及新世界係世博概念股，分別喺上海開百聯百貨，及南京東路開五星酒店嘅新世界。距離世博唔夠 70日，預計會有 7000萬人次參觀，一般認為會利好房地產、酒店及公路股等，但其實世博已接近最後大直路，就好似當年炒奧運概念咁，基建等概念股一早散晒水。所以散戶對世博唔好有太大期望，頂多作為短線利好炒吓。平心而論，呢個長達半年嘅會期，創造大量人流物流，真正受惠板塊係航空公司、收費公路同酒店等。航空股近日趁亂世，早已一浪走高於一浪，特別係中國國航（ 753）值得多加留意。要搵跌得多抵買嘅，可留意上海實業（ 363），就快形成雙底，旗下有滬寧高速公路、地產、酒店、醫藥等，勝過單買一隻錦江酒店（ 2006），有助分散風險。胡孟青