陸羽仁 - 集資到大市好

港股靜得耐開始玩吓嘢，昨日來一個單日轉向，先插後彈，期指波幅更大，10點左右的低位20092點，彈到12點幾高位20759點，高低波幅 667點。恒指收報20623點，升246點，期指收報20660點，升265點，高水37點。大市熱度升溫，成交回升至601億元。

有少少跡象顯示有資金流入，令港元匯價走强，可能係近日大市回升嘅原因之一。以往牛市港匯最強就是7.75，早前市場弱的時港匯回落到7.77至7.78，本周又回升到了7.76，側面反映資金流入。

政府前日拍賣將軍澳地皮，賣到個好價錢，本地地產股繼續成為推動大市上升嘅火車頭。

期指首現高水

期指走勢值得關注，過年後大市彈咗兩日就倒插，期指長期低水，但昨日自早上11點幾大市開始抽上之後，期指就開始由低水轉為高水，換言之，係期指扯住大市向上。由於本月期指在明天(周四)就結算，恐怕又係一個決戰時刻。

昨日恒指高位20711點，距離2月3日上個反彈浪的高位20780點，只有幾十點差距，若果今浪反彈能明顯超過20780點，就造出一個一浪高於一浪的走勢，確認早前在2月8日的低位19423點，已經是呢一浪的低位，往後可望反覆向上。

中環茶友話，港股走勢暫時弱於美股，因為美股在2月2日的反彈浪高位10314 點，但杜指上周五已衝到10438點的高位，比上浪高位高100點有多，一級一級向上。

如果話港股暫時未見強勁氣勢，都可能同水頭唔係好足有關，因為去年底新股上市高峰時，曾有6400幾億資金流入香港，而家得番2000幾億，大部份錢炒完就走咗，而家即使有啲錢入番來，亦只是「前菜」，我估要到新股上市比較熱鬧時，大市先至會大旺。

AIA四月出台

我就香港今年新股IPO情況求教於金融高人，佢話舊年香港IPO好威水，集資額2400幾億港元，係全球第一，但今年仲會好過去年咁話(估計3000億港元以上)。我心諗如果IPO來就有水，大行要推新股就要炒高個市的邏輯，真係要索吓料幾時有巨量IPO出台，一查之下，發覺最快4月就到，4月美國國際集團 (AIG)分析美國友邦保險(AIA)在港上市，傳聞集資額200億美元(1560億港元)，係一隻巨股，5月就有太古(019)分拆太古地產上市，傳聞集資額有50億美元(390億港元)，兩隻加埋已經差唔多2000億，都咪話唔厲害。

AIA的包銷團更粒粒皆星，高盛、瑞銀及大摩等8、9 家巨型外資行全部落齊做包銷，仲有一批中型行做聯席包銷，照計有晒所有大隻佬坐鎮，佢哋都會搞熱啲個市，否則大市冷冰冰，AIA點喺個市度集資1000幾億？所以按理到3月香港個市都要進入熱身階段，4、5月先至可以上演大龍鳳，到時外圍好差、大戶想做都做唔起就無得好講，即使外圍環境一般，個市唔熱都要搞到佢熱啲啩。

另外，新鴻基地產周一以33.7億元投得將軍澳地皮後，券商普遍看好新地前景；摩根大通重申對新地「增持」的投資評級，以及目標價135元，潛在升潛32%。野村也發表報告表示，新地投得將軍澳地皮成交價，高於該行及證券業預期，倘若未來每平方呎售價6,418元，毛利率可達 20%，指賣地成績對樓市影響正面，予新地「買入」的投資評級及目標價147.3元，指其為長線首選股。

hightea@hkheadline.com