陸羽仁 - 無勁招樓照炒

昨日可謂新聞多籮籮，美國消費者信心低迷，美股杜指上日大跌100點，期指臨近結算，財爺又公佈預算案，每樣嘢都左右大市，港股在外圍沽壓中開市，最終收報20468點，跌155點，大市成交回落至540億元，股市在期指結算前夕有少少彈力，不致一瀉如注。

美國消費者信心指數意外地大幅下跌，投資者對美國經濟復甦憂慮重燃，打擊風險投資意願，美國國債再度成為避險工具，美元上升至八個月新高，大宗商品市場受壓，能源股及金融股成為拖累大市的主要元兇。

地主股愈講愈升

昨日支撐大市嘅係連續多日走強嘅本地地產股，要多得財爺的預算案沒有厲害招數打擊炒樓，地產股靠穩，恒指地產分類指數逆市上升0.5%，個股有升有跌。

財爺「鬍鬚曾」昨日宣讀2010年度財政預算案，由於呢個年度由預計有赤字變有盈餘，財爺點都要派吓糖、減吓稅、免全年差餉、免公屋一個月租、免商業登記費、派多一個月綜援和生果金，人人有得收少少，不過人人都話唔夠。除咗津貼貧童上網費之外，今次財爺派糖方向都有少少蕭規曹隨。

市場關注政府有無厲害的打壓樓市措施，結果財爺出咗啲「散招」，包括提高2000萬元以上的樓宇買賣印花稅0.5%至4.25%，勾地表上土地兩年勾唔出會推出來拍賣，部份土地限制只起細單位，並且研究活化市場上20幾萬間二手居屋。其實你睇地產股無跌就知，投資者普遍認為這些措施非常溫和，對樓市影響不大，我話直頭係將地產股頭頂懸劍放低咗。

去年特首公佈《施政報告》，無乜打壓樓市措施，事後被人嘈到暈，金管局馬上收緊2000萬以上豪宅按揭到六成，老實講，我都有少少擔心政府在政治壓力下會出重招打擊樓市，咁樣對股市都有衝擊，而家睇嚟政府暫時唔想大力做嘢。

有地產代理界大佬叫政府

「果斷大幅增加土地供應」，話咁先至可以壓低樓價。唔好意思講句，呢啲建議有少少「山草藥」的味道(噏得就噏)，香港唔係未試過「果斷大幅增加土地供應」，喺 97年上任特首董伯伯推出85000政策，咪就係大幅增加供應囉，85000政策推出唔夠幾個月，樓市就大跌，呢個禍搞咗好幾年，董伯伯俾人閙到反肚，結果腳痛下台，香港經濟沉咗幾年。若果政府信咗呢啲建議，搞到樓市大插時，120萬業主唔知搵邊個投訴。

經濟發熱火上加油

大家唔好以為我認為財爺的樓市政策好得，實在剛好相反，我認為?家啲措施唔係好得，在資金氾濫利息低企下，阻唔到樓價再升。但我認為政府無辦法搞到啱啱好，搞得細力樓市無反應，搞得大力樓市泡沫隨時爆破(我認為個別地方已起晒泡，例如元朗10000元一呎的特色戶你話有無泡呀？)，政府只能一路整吓色水，樓價升得太緊要時又作勢勒吓。?家呢個樓市，根本係一個焗炒格，但若果你係長線用家，長揸而唔係短炒的話，真係要諗清諗楚好唔好入市，後生仔買唔到樓唔使急，樓市有周期，跌得太殘會升，升得太顛最後會爆，有錢可以買吓股先。

我睇今年本地經濟隨時會過熱，因為大量基建定好在今年開始上馬，本來已會拉低失業，推高通脹，再加上歐美因經濟過冷要持續大量放水，單係美國已有1萬億美元銀行游資未借出街，放在聯儲局戶口收緊0.25厘低息，這些熱錢一遊到香港這些本來已經熱熱地的地區，自然係火上加油，今年都係炒作的世界囉。

hightea@hkheadline.com