青心直說：政府放手樓市續熱炒

政府推出 6大紓困措施，最大篇幅在於穩定樓市。財爺大加 2000萬元以上豪宅印花稅，又話推出新元朗地皮以增加土地供應，希望切合預算案主題「穩固復蘇、發展經濟，建立關愛社會」。冇錯，政府為咗穩固復蘇，要繼續鼓勵 2000萬元以下樓市炒風；發展經濟則以一貫炒炒賣賣的港式經濟為基調；而建立關愛社會，因為唔使用政府錢，財政預算案入面梗係唔包。地產救港，唔使刺激就業，唔使幫年輕人買樓，弱勢社群免交兩個月公屋租金塞住佢哋把口，總之人人為樓，樓為人人，個個炒樓！政府變相鼓勵炒風，市況已充份反映，地產股可看俏。現時地產股估值唔平、息率唔高，但既然樓價繼續睇升，股價冇理由落後過中移動（ 941）呢類公用股。不過投資者都要小心，大隻嘅近兩日升咗唔少可能遇沽壓，其實仲可以搵啲坐擁好多收租物業，而又未喺股價上反映嘅股份。
小注敲彩星等放榜

記得去年 9月講過彩星集團（ 635），當時經主席不停以自己及全資擁有控股公司 TGC回購及增持後，去年 11月以高溢價認購旗下彩星玩具（ 869） 3000萬美元可換股債，股價一度炒高至 3蚊樓上。可見若捉到大股東增持手影，往往可以坐一轉順風車，等同年廿九在「港股王」推隻嘉華國際（ 173），就係見主席呂志和增持，先至搭佢順風車，唔通 3蚊樓上叫人接火棒咩！近期彩星靜咗好多，不過喺 1、 2月兩度行使認股證，暫時還未見到大股東有減持動作。記得上次都提過，公司手持大量優質出租物業，資產值數以 10億元計。根據 08年年報，彩星持有物業當時值 15.5億元，除咗廣東道彩星大廈， 05年亦以 2.18億元買入半山麥當勞道多個物業。既然政府繼續隻眼開隻眼閉，豪宅繼續有價，可以預期彩星呢部份盈利及物業重估收益驚人，仲有機會派高息送紅股或認購證。貨疏短炒無謂，小注持有等業績驚喜，博財息兼收。胡孟青