陸羽仁 - 雙軌制暗增賣地

美國聯儲局主席伯南克周三出口術，話將在較長一段時間內將維持低利率不變，成功將美股起死回生，收復上日大部份失地。不過港股在期指結算日就先升後跌，恒指早上高開44點後，跟住升近170點至20644點，就隊番落嚟，下插逾38 0點才見支持，恒指中午以後反覆回升，跌幅逐步收窄。

恒指收報20399點，跌68點或0.4%，大市成交續增至615億元。

昨日頂住大市跌勢嘅依然係本地地產股，預算案調控樓市的措施溫和，恒指地產分類指數逆市升0.7%，遠遠跑贏大市。

政府「騰雞」唔敢大郁

發展局局長林鄭月娥開記者會講今年推出土地表，就隱藏一啲暗招，今年度推出46幅住宅地，有11幅係新加入勾地表，有6幅市區住宅地講明可以主動拍賣，包括以往勾極勾唔出的何文田佛光街地皮和東半山聶歌信山道地皮。

財爺在預算案中講兩年內多次勾唔出的土地可以主動拍賣，當時大家唔知佢想點，而家輪廓比較清楚，其實係一個變相雙軌制，即係保持由發展商勾地機制的同時，另外有六幅地已定咗會拍賣，等如增加咗呢六幅地的供應(假設佢哋本來好大機會勾不出來拍賣)，由於呢六幅住宅地主要可以起豪宅，等如政府暗暗增加豪宅地供應。

不過中環茶友話，政府增加土地拍賣的手法溫和，唔係改晒勾地制，只係改少少，只加六幅地，而家賣地只佔土地供應兩成左右，三成係發展商補地價改用途，另外四、五成係鐵路公司加市建局推的地，所以即使拍賣部份土地略增，都唔會令市場有土地供應大增的感覺。

茶友話，其實政府相當「騰雞」，因為樓價地價已經幾貴，佢好怕一話大量增加土地供應，立刻推低樓市，到時「煲呔曾」有機會步董伯伯後塵，要腳痛執包袱，所以增加土地拍賣都係小心翼翼，兼且唔敢大鑼大鼓去做。發展商對呢個雙軌制初步無乜大反應。

中資金融股係昨日拖低大市的主要元兇，恒生中國H股金融行業指數中國銀行跌0.9%，傳聞要融資的中行(3988)跌2.1%。

滙控偷步炒業績

下周一公佈業績的滙控(005)仍被睇好，升0.8%，升到85.3元，近一個月的高位，睇嚟不少人偷步炒業績。下星期開始步入公司業績公佈高潮，滙控特受關注，若果大笨象業績似模似樣，可以帶起大市。

中電(002)昨日公佈09年全年業績，純利82億元，較08年同期104.2億元，倒退21%，但略優於市場預期。中電每股盈利3.41元，擬派每股末期息92仙；期內營業額跌6.7%至506.7億元。

中電都係內地盈利增長好過香港，09年的本地售電量增長1.7%至30,570百萬度，主要因為去年天氣較熱，用冷氣需求增加，但製造業的售電量持續下跌；同時中電售予中國內地的電量較08年上升5%，主因是下半年廣東經濟復甦，帶動電力需求回升所致。中電昨收53.25元，跌0.5%，以09年純利計市盈率15.6倍，不過不失啦。

hightea@hkheadline.com