陸羽仁 - 麵粉貴過麵包時代又到

聯儲局上周五加貼現率，港股嚇到腳軟，恒指上周五勁挫近600點，但歐美股市死唔去，加上昨日內地農曆新年後復市亦無大跌，有利港股反彈，恒指收復上日大部份失地。恒指收報20377點，回升483點。大市交投仍然偏淡，但成交略為回升至439億元。

下午開市個市回咗啲，但一路賣地，一路反彈，結果塊將軍澳地由新地(016) 以33.7億高價投得，股市都跟住彈番高啲，成功投地的新地昨日漲2%至102.1元；地產股氣氛全線轉好。

地產股因賣地炒高

新地的元朗盤YohoMidtown賣到高價，美銀美林隨即上調新地2010年每股淨資產值預測3%至143元，主要反映YohoMidtown平均呎價較預期高很多，加上新地物業發展能見度大大改善，如今已鎖定今年70%賣樓收入，重申「買入」評級，目標價1 31元。

講番昨日賣地，今次拍賣的將軍澳66B區地皮，近住將軍澳站，最終由新地以3 3.7億元投得，投地場面激烈，最後階段由南豐同舉三號牌的不知名買家鬥個難分難解，最後由三號買家投得，事後先知係代表新地投得，由於新地在旁邊將軍澳地鐵站上蓋有地，兩塊地互相呼應發展，可塑性會大好多，起碼可以搭條天橋連到地鐵站，所以新地今次競投都係志在必得個隻，情況同早前信和(083)投馬鞍山地的情況一樣，當時信和主席黃志祥高價投得土地後，還要多謝行家支持，無將地價抬得太高。

新地呢塊地成交價每方呎樓面地價約4627元，較勾地價20億元高68.5%，市場原本預期將軍澳地皮拍賣價26億至34億元，新地差唔多要用上限價先至投到，將來起好樓唔賣到6000元一呎以上都無肉食。

?家將軍澳二手樓4000幾元仲有交易，所以?家係「麵粉價錢貴過麵包」，出現呢種情況，係發展商睇好後市的表現，你可以話樓市開始有啲過熱，亦可以話樓市未升完，呢種係杯水半空還是半滿的問題。有資深樓市投資者話，樓市和股市一樣，開始過熱後，還可以更熱，麵粉價錢貴過麵包後，會持續一段時間。

財爺無猛招打樓市

目前樓市遺留的阻力係明天公佈的財政預算案，要睇吓有無啲打擊樓市的厲害措施，不過高人話預算案無乜打擊樓市的猛招，唔會大力增加樓宇供應，唔會復建居屋，財爺只會出一啲細招，例如增加二千萬以上豪宅印花稅，會搞活一下居屋二手市場等。而家市場有少少擔心政府出招，你睇地產股股價都有啲窒窒地，但最後若見政府無勁招出場，又會再炒過。

高人話，?家利息咁低，鼓勵咗人入市買樓，睇市民對樓價的承受力，是睇供款佔家庭收入的比例，過去平均比例係53%，而家呢個比例只係38%，即係話好多人供樓無乜壓力。當然，若利息急升，例如最終升3厘去番「正常」水平，供款大增，承受比例會急升到47%，就好接近平均水平，當然若樓價再升，都會拉高供款和拉高這個比例。總之一句講晒，睇嚟政府短期不會大力增加樓市供應，短期仍是易升難跌，或者回吓又再上。不過長線啲睇，用8000元、9000元一呎去買元朗特色單位，就點睇都係貴咗啲啦。

內地股市昨日是虎年第一個交易日，雖然節前有加銀行存款準備金率消息，昨日都頂得住吓，更曾一度倒升，尾段回軟，上證綜指收3003點，小跌0.5%。內地股指期貨開始接受開戶，快將出場，有期指炒，股市的大時代又到啦。