陸羽仁 - 一好一壞十字街頭

美股標普500指數和納斯特克指數已創一年新高，較傳統的杜指也向新高挺進，但表面看港股好像欠缺火氣一樣，在21200點左右上落。恒指上周五收報21,209，跌18點，成交金額減至482億元，頗有牛皮待變的味道。

睇深一層，港股亦有少少頂住唔想跌之感。高盛調低滙控(005) 評級，將評級由「買入」調低至「中性」，並將佢由「確信買入」名單中剔除，將目標價由122 元大幅低至91元，消息令滙控跌0.6%，跌至81.3元。

另外內地股市亦插，受憂慮加息和政府會提高發展商拿地的保證金影響，上證指數跌1.2%，收3013點，資金從五大類股份中流出，包括中小板股票、上海股、房地產股、新能源股和銀行股。阿爺收緊銀根的威脅未除，上證綜指完成反彈上3100 點後，又再有向下尋底之勢，下行目標在2900點左右。不過港股在滙控下插和A股失重兩大利淡消息影響下，仍幸保不失，顯示大市短期有點支持。

內地可能月內加息

中環茶友話，港股處於美股向好，內地向淡兩種一好一壞的拉力下，正處於十字街頭，若單論港股走勢，似一個小圓頂，無乜力上，本來唔係咁睇好，但唔上唔落可能是好淡爭持的結果，後市要睇美股和資金流向。

內地股市唔好，和中國剛公佈的2月強勁數據有關，大部份數據都比市場預期強勁，2月居民消費物價指數(CPI)和去年同期比較升2.7%，比市場預期的2至2.5% 為高，比對1月的1.5%亦有明顯升幅，當中食物價格升幅大於預期，更是敏感課題。由於一年期存款利息開始低於通脹率，即係話存款實質上係負利率，會慢慢促使資金從銀行存款流向投資市場。

2月的生產物價指數(PPI)同樣高企，和去年同期比較上升5.4%，比1月的4.3% 明顯上升，亦比市場預計的5.1%為高。德銀大中華首席經濟學家馬駿話，由於鐵礦石、鋼、煤、化工原料等多種生產資料價格仍在上升中，而中國2月出口大升，未來幾個月有趨勢持續，亦會增加出口生產商的議價能力，他估年中PPI升到7至8%並不為奇。

佢從這些數據估計，中央決策者好大機會會收緊貨幣、財政、匯率以至房地產政策，而通脹數字會加大社會政治壓力，令利息在1、2個月內上升，估計今年要加兩到三次息，總加幅是0.81厘；人民幣匯價改革亦會在上半年發生；在未來數月中央亦會發指示限制地方的項目貸款；而收緊房地產政策會令樓價在第二季回落。但佢對股市中線維持樂觀，只是對政策敏感的行業如銀行、地產、商品、石化、能源股短期抱有戒心。

資金流入炒人仔升值

北方氣候短期不利港股，但西方刺激卻在增加中。內地加息和人民幣升值的機會增加，正吸引資金流入香港炒人民幣升值。追蹤資金動向的EPFRGlobal話，至上周三的一周內，有2.4億港元資金淨流入中國股票基金，是今年一月底以來，首次有資金淨流入。EPFR話，外國資金在年初減持中資股避險，已反映了中國加息等因素，如今從新部署資金投資中國，明顯是睇準人民幣年內有秩序升值，隨着人民幣升值預期升溫，將會有更多資金流入中資股。

年初至今，港股和內地股市落後於美股，主要受阿爺收緊銀根開始退市，影響了投資者的信心，股市係炒預期，見有壞消息在前，就先行走避。但未來內地股市以至香港的中資股，中線亦有利好因素。

第一，內地股市今年跌得多，價值慢慢浮現。今年至今中港股市大落後，在全球主要指數中，東歐斯洛伐克股市表現包尾，但內地的上證綜指都以跌8%排尾二，港股排尾九。內地部署退市得早，股市也跌得早。但論經濟基調，內地好過美國，所以內地股、港股跌得多，就會令外資覺得便宜，吸引他們入市。

第二，炒人仔升值利香港。過去話等4月港股集資高峰時資金流入，會炒高股市，而家內地數據好、人仔升值機會增加，又變成另一個外資流入香港的理由。外資炒人仔升值，可以把資金泊在香港炒內地相關股票，亦可以借香港作跳板潛入內地，直接炒升值。

3000億未准調入內地

阿爺都感受到外匯流入的壓力，據金融界猛人講，去年末段到今年初中資公司在香港上市或配股集資有3000億港元，佢哋想將錢調回內地，但阿爺因為外匯太多，暫時唔批准佢哋調錢番去，這些錢唯有暫時泊在香港，可見資金流入壓力之大。

第三，壞消息面世係利好。今年頭段內地股市低迷，聽聞內地證券行估阿爺拖得就拖，無咁快加息。但外資行的睇法相反，希望阿爺快點加息。因為股市炒預期，預期壞消息將出現會跌，到壞消息真正出現時反而會升，好多股份在正式踢出指數成份股行列之日，股價反而上升，就係呢個道理，要沽的一早沽清，所以壞消息體現時，一有少少買意，就逼令淡倉大舉平倉，推動股價大反彈，所以到中國真正加息時，不要以為好淡，到時去沽貨，否則好易夾死，因為懸劍跌下之日，可能就是股市上升之時。

十次流入八次升

港股正處於十字路口，如果我單純係一個圖表派，就會睇淡，美股升港股跟唔上，恒指呈一個小圓頂之勢，好似會向下落。但基於上述中線利好的因素，特別係有資金流入的跡象，又覺得唔可以純粹睇圖。呢個星期會好關鍵，美股期貨將在本周尾季度結算，近期美股走勢強勁，在結算前延續上升的走勢居多，問題是假設美股向上，究竟港股會唔會跟美股向上突破？若美股抽上而港股反應輕微，就要小心升唔多就要跌。若港股能維持較強勁的走勢，就有向上突破的動力。

茶友總結，香港係一個資金市，若資金持續流入，唔好睇得太淡，因為按過去的經驗，10次資金流入，有8次港股會升，理由亦好簡單，資金流入後無乜好做，都會買吓股票，順勢炒高股市，所以港匯強弱，都係港股一支探熱針也。