陸羽仁 - 大學生搵工前先定位

上周有報道話有5個山東濟南的大學生，因為搵唔到嘢做，結果做咗掏糞工，月薪3000大元，成為人間慘劇。

作為大學生，最後要做掏糞工，那怕是做一日，都係好大的悲哀，但悲哀還悲哀，有些事情是無可避免要發生。

我估要去做掏糞工的大學生，不是山東第一流大學成績最好的畢業生(不要說是全國大學了)，只是普通一個大學生，或者各種指標都排到比較後的大學生。

內地大學生加入「戰團」

千祈唔好話大學生要掏糞是社會的錯，因為中國政府係有意大量培養大學生，1年培養近670萬個，假設以這個速度繼續下去，10年培養6700萬個大學生出來，可以培養出一個高教育的人群，對中國未來發展至關重要，無高教育的勞工，那有可持續發展的經濟，難道10年後、20年後中國經濟還主要是靠工廠工人出賣純粹勞力賺錢嗎？所以中國領導明知培養這麼多大學生，就業問題相對較大，還是一咬牙就去大量製造大學生，亦間接令香港大學生多了競爭。

假如我唔夠努力或唔夠聰明，在內地讀唔到一流大學，在大學內考唔到一流成績，搵工半年都無出路，而家有一份掏糞工放在我面前，我一定做。當然，我都唔想一世掏糞，但以一個大學生去掏糞，又是否可以掏出彩虹呢？

港人子女太受保護

起碼做半年都可以出番本《我的掏糞日記》，收番幾十萬版稅，話唔埋好似「犀利哥」咁出埋位，一舉成名。更現實的是一個大學生以掏糞成名，政府為咗唔想大學生咁喪氣，一定會幫我搵份好工，以證明大學生只要肯捱，總會有出路，唔會俾我掏糞終老。但如果呢個故事發生在香港，你估有無大學生願意掏糞，我估就無啦，因為香港人對子女照顧得太好啦(內地大城市的一孩亦有這種問題，但農村孩子多，就命賤很多了)，個仔女搵唔到工，阿爸阿媽就會講，唔緊要，阿爸阿媽喺大廳，你返屋企啦，結果只係多咗一個宅男。人好衰，只要你有條舒適的後路，就無人願意搏命。

肯博肯捱行行出狀元

所以我建議大學生先為自己找一個定位，好似我問大家你想投機還是投資一樣，你問吓自己肯唔肯博命，願唔願意掏糞先？你話我唔錫身，想博命，想出位，想發達，咁做乜鬼政府工，做政府工最成功嗰個都日日俾人鬧，你前世俾人鬧得少咩，點解唔去私人機構博，甚至去內地博？

以前話大學生做AO(政務主任)係絕世好工，而家開始覺得唔係咁啦。對博命者而言，有無大學學位都唔係太緊要，行行都有博到上位的人，大學生或者個切入點高一級半級，花兩三年都可以追到。開頭人工低啲唔緊要，過5年至10年就追番突

但係如果你自問唔係博命一族，又唔係一流大學的一級榮譽學生，又要問吓自己，點解覺得好易搵到份工年薪228000大元(即係19000元一個月)，經濟衰退時唔怕俾人炒的政府工？政府工咁多人搶，就知道係好工，所以要努力搵來做，而且呢啲工唔係咁易外判，唔憂內地願意掏糞的大學生來搶。

人要搵啱自己的定位，先至無咁容易失落。當然，如果你條件低，要求高，要高薪，又唔想做，咁就最好出世前先揀啱個老竇，當時揀唔到，而家都無乜辦法達到你的要求了。