青心直說：兩會尋寶不妨扒冷

兩會未開股民先興奮，呢個係市場慣例，前日講過嘅「鑊仔底」越炒越旺，資金輪流炒落後嘅新能源板塊，唔少半新股翻生，破頂大成交上升，係踏入虎年後少見嘅盛況。滙豐控股（ 005）冇得炒、港交所（ 388）動力唔夠、中國移動（ 941）同內銀股又唔郁，資金趁好消息喪炒新能源，投資者小心兩會開後「見光死」。噚日講過嘅摩比發展（ 947）果然大成交破頂翻生，輔助指標都配合到，睇怕蟹貨已消化得七七八八。開口中之二係寶龍地產（ 1238），三爬兩撥上番 10日線，持有而喺低位沽咗嘅證明你定力未夠，惟有下次學精啲。由於低位反彈已有 15%，現價追入就要冒風險，慎防中央政策打壓樓市，又有藉口將佢推低。中線嚟講佢嘅短期複合平均線剛升穿長期阻力，情況有啲似中國海外（ 688），等埋業績先決定。翻生嘅半新股，仲有中國高精密（ 591）同三一國際（ 631），即市短炒無妨，坐過夜又嫌佢升得多會回，都係周圍望吓搵啲冇升得咁誇張嘅穩陣啲。

農業板塊吼玉米
搵到氣咳終於搵到，又係一直喺我觀察名單嘅新能源股真明麗（ 1868）。去年我以「超級碗」形容佢，以技術走勢去量度升幅，升穿圓底頂部（ 3.27元）後已反覆升夠，最高見過 6.84元，中段先加入追貨都升到一個 Double，由去年 8月到家用咗半年時間，算係咁啦！現價已回番到上一個平台支持，低位揸到家可考慮「溝上」，未買就最好分注，因為佢好波動。除咗新能源，農業問題亦係兩會重點。農業股好似超大現代（ 682）早已炒上，反而可以留意吓其他農作物，好似粟米。國際糖價喺 2月初見過 29年高位後回落，調整已超過 20%，有機會反彈。由於廣西年初遇旱災，糖協下調今年供應至 1100萬噸，而上年係 1243萬噸，可見供應正在減少而需求卻在增加。用粟米做糖嘅西王糖業（ 2088）都係農業股，點解冇人理佢？若再跌到 2.20元算係好有防守性。仲有中國玉米油（ 1006）開始有異動，可望多兩眼。胡孟青